Qyrǵyzstannyń Ortalyq sailaý komissiiasy 2021 jylǵy 10 qańtarǵa belgilengen prezident sailaýyna qatysýǵa úmit bildirgenderden qol qoiý paraqtary men kepil aqsha tólegeni týraly anyqtamalaryn qabyldaýdy aiaqtady. Áý basta dodaǵa qatysýǵa 65 adam talpynys jasaǵanymen, tek 20 kisi ǵana tiisti qujattardy ótkizgen.
Bir úmitker, Qyrǵyzstan Jogorký keńeshiniń depýtaty Samatbek Ibraev tek 15 myń 33 adamnyń ǵana qolyn jinaǵan, sondyqtan ony jaqtaityndardyń qol qoiý paraqtary úmitkerdiń ókilderine qaitaryldy. Ibraev kepil aqsha salǵany týraly anyqtama da ótkizbegen.
Ortalyq sailaý komissiiasy memlekettik tildi tiisti deńgeide meńgerdi degen sertifikaty joq jáne sottylyǵy alynbaǵan 12 úmitkerdiń qujatyn qaitaryp bergen. Qalǵan úmitkerler túrli sebeppen dodaǵa qatysýdan bas tartty.
Qujattary qabyldanǵan basqa úmitkerler 30 myńnan 60 myńǵa deiin adam qol qoiǵan paraqtar ótkizgen.
"Endi sailaý komissiiasy segiz kúnniń ishinde jinalǵan qoldardyń rastyǵyna kóz jetkizýi kerek" dedi Ortalyq sailaý komissiiasyndaǵy jumys tobynyń hatshysy Aidai Rýslanova.
Úgit-nasihat 15 jeltoqsanda bastalyp, 9 qańtarǵa deiin júrgizilmek.
Zań boiynsha Qyrǵyzstan prezidenttigine kanidat bolyp tirkelý úshin úmitkerler keminde 30 myń qoldaýshynyń qolyn jinap, 1 million som kepil aqsha tóleýi kerek (shamamen 11 800 AQSh dollary).
4 qazanda Qyrǵyzstanda ótken parlament sailaýynyń qorytyndysymen kelispegen jurt kóshelerde narazylyq ótkizip, munyń sońy memlekettik ǵimarattardy basyp alýǵa, saiasi daǵdarysqa alyp kelgen. Halyq narazylyǵynan soń úkimet te, prezident Sooronbai Jeenbekov te otstavkaǵa ketken.
Saiasi qarsylasyn urlap áketkeni úshin qamaýda otyrǵan Sadyr Japarovty narazylyqqa shyqqan jurt 5 qazanda túrmeden bosatyp alǵan. Keiin parlament músheleri ony premer-ministrdiń mindetin atqarýshy etip taǵaiyndady. Jeenbekov ornynan ketken soń ol prezident mindetin de qosa atqarýǵa kóshti.
Qarashanyń ortasynda Japarov prezident sailaýyna qatysý úshin prezidenttiń jáne premer-ministrdiń mindetin atqarýshy ókiletterinen ýaqytsha bas tartty. Buǵan qosa ol elde konstitýtsiialyq reforma jasap, prezidenttik basqarý formasyn engizip, sol arqyly atqarýshy biliktiń quzyretin arttyrýǵa talpynyp júr.
Qyrǵyzstandaǵy prezident laýazymynan úmitkerler arasynda ulttyq qaýipsizdik jónindegi memlekettik komitettiń burynǵy tóraǵasy Ábdil Segizbaev, oppozitsiialyq "Bútún Qyrǵyzstan" partiiasynyń jetekshisi Adahan Madýmarov, oppozitsiialyq "Reforma" partiiasynyń basshysy Klara Sooronkýlova, parlamenttiń eks-cpikeri Qanat Isaev jáne ishki ister ministriniń burynǵy orynbasary Kýrsan Asanov bar.
