Qyrǵyzstannyń ortalyq sailaý komissiiasy prezidenttikke úmitkerlerdiń sailaý qoryna túsken kirister men shyǵyndar týraly aptalyq esebin jariialady.
OSK saityndaǵy málimetke qaraǵanda, 2020 jylǵy 25 jeltoqsanǵa deiin prezident sailaýyna túsip otyrǵan 18 úmitkerdiń bank esebine 104,5 (1,2 million dollar) túsken. Onyń 51,5 million somy Sadyr Japarovtyń úlesinde.
Ekinshi orynda – kásipker Babyrjan Tolbaev. Onyń qoryna 14,2 mln som túsken. Úmitker bul aqshanyń 9,2 million somyn jaratyp úlgergen. Al Japarov bolsa, sailaý qoryna túsken qarajattan 50,4 million som jumsaǵan.
25 jeltoqsandaǵy aqparat boiynsha, 18 kandidat sailaýaldy naýqan aiasynda 94,6 million som jumsaǵan.
Qalǵan kandidattardyń sailaý qory 5 million somǵa (61 myń dollar) da jetpeidi. 11 úmitkerdiń jiǵan qarajaty – 1 million men 3 million som aralyǵynda.
21 jeltoqsan kúni Batken oblysy turǵyndarymen kezdesýde Sadyr Japarov sailaý qorynyń halyq arasynan jinalǵan aqshadan quralǵanyn málimdegen. "Qordaǵy aqshanyń bári halyqtan túsip jatyr. Zeinetkerler zeinetaqysyn berip jatyr. Myna plakattardy halyqtyń ózi jasap otyr. Túrmede otyrǵanymda da qajetpen qamtamasyz etken halyq. Aqsha, azyq-túlik, kiim berip jiberip otyrdy. Meni úsh jyl halyq asyrady" dedi ol sol kezde.
Qyrǵyzstanda 4 qazan kúni parlament sailaýy ótip, artý halyq tolqýyna ulasty. Sailaý nátijesi shyǵyp, bilikke jaqyn partiialar jeńimpaz jariialanǵanda, daýys urlandy degen halyq kóshege shyǵyp, jappai narazylyq bastaldy. Tolqý kezinde jaqtastary adam urlaý aiybymen sottalǵan Sadyr Japarovty kúshpen túrmeden shyǵaryp aldy. Tolqý bastalǵaly on kún ótken soń el prezident Sooronbai Jeenbekov otstavkaǵa ketti, onyń mindetin sodan birneshe kún buryn premer-ministr atanǵan Sadyr Japarovqa ótti. Keiinirek Japarov prezident sailaýyna túsý úshin prezident mindetin atqarýdan bas tartatynyn málimdedi. Qazirgi zań boiynsha, ýaqytsha prezident sailaýǵa túse almaidy.
Kezekten tys prezident sailaýy 2021 jylǵy 10 qańtarǵa belgilengen. Sailaýaldy úgit-nasihat jumystary 15 jeltoqsan kúni bastalǵan.
