Premer-Ministr Álihan Smaiylov elorda áýejaiynda halyqaralyq is-sharalarǵa qatysý úshin kelgen Qyrǵyz Respýblikasynyń Prezidenti Sadyr Japarovty kútip aldy, dep habarlaidy "Ult aqparat" Úkimettiń baspasóz qyzmetine silteme jasap.
Japarov Aziiadaǵy ózara is-qimyl jáne senim sharalary jónindegi keńestiń VI sammitine, TMD memleketteri basshylary keńesiniń otyrysyna jáne «Ortalyq Aziia – Resei» sammitine qatysady.
Aita keteiik, 12-13 qazanda Astanada Aziiadaǵy ózara is-qimyl jáne senim sharalary jónindegi keńestiń VI sammiti ótedi. Sammitke Ázerbaijan, Irak, Iran, Qazaqstan, Katar, Qyrǵyzstan, Palestina, Resei, Tájikstan, Túrkiia, Ózbekstan jáne Belarýs basshylary, Vetnam vitse-prezidenti jáne QHR Tóraǵasynyń orynbasary qatysady.
Al, 14 qazanda Astanada Dostastyqtyń joǵary organy – TMD memleketteri basshylary keńesiniń otyrysy ótedi. Is-shara barysynda TMD alańyndaǵy ózara is-qimyldyń ózekti máselelerin talqylaý, saýda-ekonomikalyq, mádeni-gýmanitarlyq salalardaǵy, sondai-aq qaýipsizdik salasyndaǵy integratsiialyq bailanystardy odan ári damytýǵa jáne nyǵaitýǵa baǵyttalǵan birqatar qujatty qaraý jáne qabyldaý josparlanǵan.
