Qyrǵyz Respýblikasynyń prezidenti Sadyr Japarov Qazaqstandaǵy jalǵyz manasshy, tanymal jazýshy, dramatýrg Baianǵali Álimjanǵa «Dostyq» ordenin tabystady, dep habarlaidy "Ult aqparat".
Marapattaý rásimine QR Mádeniet jáne sport ministri Aqtoty Raiymqulova qatysty.
Qyrǵyz Respýblikasynyń prezidenti Sadyr Japarovtyń Jarlyǵyna sáikes, qyrǵyzdyń «Manas» eposyn Qazaqstanda tanytyp, Qyrǵyz Respýblikasy men Qazaqstan Respýblikasy arasyndaǵy mádeni seriktestikti nyǵaitýǵa qosqan úlesi úshin Qazaqstannyń eńbek sińirgen qairatkeri, jazýshy, dramatýrg, aitysker-aqyn jáne manasshy Álimjanov Baianǵali Toqanuly «Dostyq» ordenimen marapattaldy.
«Maǵan úlken qurmet kórsetip, eńbegimdi baǵalady. Osyndai mańyzdy ordendi tabystaǵany úshin qyrǵyz halqyna alǵys aitamyn. Men qazaq epostaryn qalai jaqsy kórsem, qyrǵyz epostaryn da solai súiemin», - dedi manasshy Baianǵali Álimjanov.
Álimjanov Baianǵali Toqanuly – aqyn, jazýshy, dramatýrg, sýyryp salma aqyn, jyrshy-jyraý, satirik, synshy, ádebiettanýshy, rejisser, stsenarist, kinoakter, tilshi, kinodokýmentalist, telejúrgizýshi, aýdarmashy, balalar aqyny jáne balalar jazýshysy, 50-den asa kitaptyń avtory.
Kóp qyrly talantty qazaqstandyqtyń týyndysy Ulybritaniiada moiyndaldy jáne ony belgili britandyq Hertfordshire Press basylymy jariialady.
Eske sala ketsek, keshe Qyrǵyz respýblikasynyń prezidenti Sadyr Japarov Nur-Sultanǵa memlekettik saparmen keldi.
Memleket basshysy Qasym-Jomart Toqaev shaǵyn jáne keńeitilgen qurammen Qyrǵyz Respýblikasynyń prezidenti Sadyr Japarovpen kelissóz júrgizdi.
Memleket basshylary ortaq birlesken málimdeme jasady.
