Búgin Qyrǵyz Respýblikasyna resmi sapary aiasynda Qazaqstan Premer-Ministriniń orynbasary – Syrtqy ister ministri Muhtar Tileýberdi Qyrǵyzstan Prezidenti Sadyr Japarovpen kezdesti, dep habarlaidy "Ult aqparat" QR SIM saityna silteme jasap.
M.Tileýberdi Qazaqstan Prezidenti Qasym-Jomart Toqaevtyń atynan Qyrǵyzstan halqyna gúldený men amandyq tilegen jyly lebizderin jetkizdi. Sonymen birge, ol Memleket basshysynyń Qyrǵyz Respýblikasymen ózara tiimdi yntymaqtastyqtyń turaqty damýyna tereń múddeli ekenin atap ótti.
Ministr Qazaqstan men Qyrǵyzstan tarihi baýyrlastyq bailanystarmen bailanǵanyn, bul bizdiń elderimiz arasyndaǵy jan-jaqty jáne kóp qyrly yntymaqtastyqtyń aiǵaǵy ekenin atap ótti. Sonymen qatar, Prezident S.Japarovtyń jaqynda Nur-Sultan qalasyna jasaǵan memlekettik sapary ekijaqty qarym-qatynastarǵa qýatty serpin bergenin aityp ketti. «Qazaqstan saýda-ekonomikalyq jáne investitsiialyq ózara is-qimyldy arttyrýǵa múddeli. Bul úshin bizdiń elderimizdiń qajetti áleýeti bar», - dedi Tileýberdi.
Óz kezeginde Qyrǵyzstan Prezidenti ekijaqty ózara is-qimyldyń qazirgi jaǵdaiyn joǵary baǵalap, barlyq qazaqstandyq bastamalar men investitsiialyq jobalarǵa jeke qoldaý kórsetetinin aitty.
«Biz Qazaqstanmen, jaqyn kórshimizben jáne dostas respýblikamen qarym-qatynasymyzdy óte joǵary baǵalaimyz. Biz qyrǵyz-qazaq jemisti yntymaqtastyǵyn odan ári keńeitýge jáne tereńdetýge daiynbyz», - dep tolyqtyrdy Japarov.
Kezdesý barysynda óńirlik jáne halyqaralyq kún tártibindegi máseleler, sondai-aq jaqyn aradaǵy joǵary jáne asa joǵary deńgeidegi kezdesýlerdiń kestesi talqylandy. Taraptar qazaq-qyrǵyz saiasi ózara is-qimylynyń aýqymyn keńeitýge jáne qazirgi saiasi bailanystardy nyǵaitýǵa erekshe mán berý qajettigin atap ótti.
Sapar sońynda qazaqstandyq delegatsiia uly qazaq aqyny jáne oishylynyń 175 jyldyǵyn merekeleý aiasynda ashylǵan Bishkektegi Abai atyndaǵy Qyrǵyz-qazaq mádeniet ortalyǵynda boldy. Ortalyqtyń qyzmeti tanymal aqynnyń shyǵarmashylyǵyn dáripteýge jáne Qyrǵyzstan men Qazaqstan arasyndaǵy mádenietaralyq bailanystar men gýmanitarlyq yntymaqtastyqty nyǵaitýǵa baǵyttalǵan.
