Qyrǵyzstan parlamentiniń spikeri, "Kyrgyzstan" fraktsiiasynyń jetekshisi Kanatbek Isaev 4 qarasha kúngi parlament otyrysynda qyzmetinen ketetinin málimdedi. Ol 10 qańtarda ótetin prezident sailaýyna qatysý oiy baryn jetkizdi.
- Jaqynda [premer-ministr] Sadyr Japarov sailaýǵa qatysatynyn aityp, resmi málimdeme jasady. Demek, ol prezident mindeti qyzmetin atqara almaidy, sondyqtan ókiletti spikerge berýi tiis bolatyn. Sodan beri jaǵdai ózgerdi. Jogorký keńesh depýtattarynyń ókilet merzimi uzartyldy, spiker memleket basshysy mindetin atqara alady. Biraq partiia músheleri meni prezident sailaýyna úmitker retinde usynyp otyr, sol sebepti prezident mindetin atqara almaimyn. Ol mindetti qaitadan úkimetke berýge bolmaidy, sebebi onda premer-ministr joq. Al prezident mindetin vitse-premerge tapsyrýǵa bolmaidy dep esepteimin. Sol sebepti daǵdarys týyndamas úshin spiker qyzmetinen ketýdi uiǵardym, - dedi Kanatbek Isaev.
Osyǵan deiin Jogorký keńesh depýtattarynyń spiker Kanatbek Isaevqa senimsizdik bildirip, qol jinai bastaǵany da habarlanǵan edi.
Kanatbek Isaev parlament sailaýynan keiin týyndaǵan saiasi daǵdarys tusynda - 13 qazanda Qyrǵyzstan parlamentiniń spikeri bolyp sailanǵan edi. Premer-ministr Sadyr Japarovtyń legitimdigi jaily daý týyndaǵan shaqta Isaev spiker bolyp turdy. Keiin ol prezident mindetin atqarýdan bas tartty. 16 qazanda Qyrǵyzstan parlamenti prezident ókiletin premer-ministr Sadyr Japarovqa berýdi maquldaǵan.
Japarov qazan aiynyń sońynda prezident sailaýyna túsetinin málimdep, jeltoqsan aiynda qyzmetinen ketetinin aitqan. Birneshe kúnnen keiin "Býtýn Kyrgyzstan" oppozitsiialyq partiiasynyń jetekshisi Adahan Madýmarov ta sailaýǵa qatysatynyn jetkizdi.
