Qyrǵyz Respýblikasynyń Ekonomika ministri Pavlodar oblysy Politsiia departamentiniń jeke quramyna alǵys joldady. Bul týraly QR Ishki ister ministrliginiń resmi ókili Nurdildá Oraz aityp berdi, dep habarlaidy QazAqparat.
«Hatta júk kóligin tizgindegen Qyrǵyz Respýblikasy azamatynyń qatty aiazda Shiderti kentiniń mańyndaǵy tas jolda turyp qalǵany, oǵan politseilerdiń kómekke kelgeni aitylǵan. «Politsiia podpolkovnigi Jaqsylyq Baiysbekov, aǵa leitenanttar Azamat Shaqshabaev pen Rýslan Vereshaktyń adamgershiligi men qyzmetinine degen adaldyǵy adam ómirin qutqarýǵa sebep boldy. Olar ózderine júktelgen mindetterdi abyroimen atqardy» dep atap ótken», - deidi Nurdildá Oraz ministrlikte ótken onlain brifingide.
Oqiǵany qysqasha baiandap ótsek, Qazgidromet ortalyǵynyń - 43 gradýsqa deiingi qatty aiaz bolatyny týraly eskertýge qaramastan, júrgizýshi Resei Federatsiiasynan Qyrǵyzstan Respýblikasyna júk avtomobilimen jolǵa shyqqan. Biraq aýa raiynyń qolaisyzdyǵynan mashinadaǵy janarmai qatyp qalǵan.
«Osyndai qiyn jaǵdaida júrgizýshini qatty úsik shalýy múmkin edi. Alaida, jol boiynda turǵan júk kóligin sol jerde qyzmet atqaryp júrgen politseiler baiqap, birden kómekke kelgen. Olar úlken júkti jyly boksqa aparyp, júrgizýshige jylynýǵa kómektesken. Kólik aqaýy jóndelgen soń júrgizýshi qaita jolǵa attanǵan», - deidi resmi ókil.
Jyl basynan beri aýa raiynyń qolaisyzdyǵynan avtomobil joldaryndaǵy kólik quraldary qozǵalysynyna 100-den astam shekteý qoiyldy. Atap aitqanda, Aqmola, Qaraǵandy, Shyǵys Qazaqstan, Qostanai, Pavlodar jáne Almaty oblystarynda kólik qozǵalysyna shekteý engizildi.
Shekteý kezinde jol belgileri men qorshaýlar qoiyldy. Qolaisyz aýa raiy jaǵdailarynda jol qaýipsizdigin qamtamasyz etý, qiyn jaǵdaiǵa tap bolǵan adamdarǵa kómek kórsetý úshin patrýldik politsiia jasaqtary kezekshilik etti. Osy kezeńde qar qursaýynan 50-ge jýyq avtokólik shyǵarylǵan.
«IIM qys mezgilinde aýa-raiynyń qozǵalys rejimderine áser etetinin, jaýyn-shashyn kezinde zattardyń kórinýi nasharlaitynyn eskerý kerektigin eske salady. Júrgizýshiler aýa-raiy jaǵdailaryn eskerip, qaýipsiz jyldamdyqty jáne avtomobilder arasyndaǵy qashyqtyqty saqtaý qajet», - deidi N. Oraz.
