Qyrǵyzstan Respýblikasy Densaýlyq saqtaý ministrliginiń málimetinshe, Qyrǵyzstan men Tájikstan shekarasyndaǵy qaqtyǵys kezinde jeti adam zardap shekken. Bul týraly QazAqparat Kabar agenttigine silteme jasap habarlaidy.
Batken oblysyndaǵy aýrýhanaǵa taǵy úsh zardap shegýshi jetkizildi. Ekeýi túrli jaraqat alǵan, taǵy bireýine oq tigen. Zardap shegýshilerdiń jaǵdaiy ortasha aýyr. Barlyǵy 7 adam zardap shekti.
Buǵan deiin Qyrǵyzstannyń MUQK Shekara qyzmetinen habarlanǵandai, Tájikstannyń shekarashylary 27 qańtarda saǵat 17:30-dan 18:00-ge deiin Qyrǵyzstannyń Batken aýdany Tórt-Kóchó eldi mekenindegi Batken-Isfana jol ýchaskesin jaýyp tastaǵan. Oqiǵa ornyna Qyrǵyzstan MUQK ShQ Batken oblystyq basqarmasynyń bastyǵy, polkovnik Kyialbek Tolonbaev pen Batken shekara jasaǵynyń bastyǵy polkovnik Rýstam Mirshakirov barǵan. Kelissózder nátijesinde jol ýchaskesi 19:30-da qaita ashyldy.
«Alaida, 19:35-te tájik tarapy Batken aýdany Chyr-Dobo eldi mekeninde Qyrǵyzstan MUQK ShQ shekara jasaǵyna qarsy qarý qoldanyp, oq atýyna bailanysty jaǵdai qiyndaǵan. Qyrǵyzstan men Tájikstan shekara jasaǵy arasyndaǵy negizgi qaqtyǵys Tort-Kocho men Chyr-Dobo eldi mekenderinde júrip jatyr. Tájikstan tarapy minometter men granatomiot qoldanýda», - dedi Qyrǵyzstan Shekara qyzmetinen.
2022 jyldyń 28 qańtaryndaǵy saǵat 08:00-degi jaǵdai boiynsha, Qyrǵyzstan-Tájikstan shekarasyndaǵy Samarkandyk, Tórt-Kóchó, Kók-Tash, Dahma, Kóchó-Boiý men Golovnoi eldi mekenderinde jaǵdai turaqty dep habarlandy.
