Qyrǵyzstan UQMK basshysy Qamshybek Tashiev pen Tájikstan UQMK jetekshisi Saimýmin Iatimov 16 qyrkúiek saǵat 16-dan bastap atysty toqtatý týraly kelismige keldi. Aqparatty Qyrǵyzstan UQMK rastady, dep jazdy "Ult aqparat" Azattyqqa silteme jasap.
Kelissóz Qyrǵyzstan, Ózbekstan jáne Tájikstan shekarasynda ótken.
16 qyrkúiekte tańerteń Qyrǵyzstan men Tájikstan shekarasynda jaǵdai qaita ýshyqqan edi. Taraptar jaǵdaiǵa birin-biri kinálady.
Qyrǵyz jaǵy qaqtyǵys saldarynan 42 adamnyń zardap shekkenin málimdedi. Reuters agenttigi bir tájik turǵynynyń qaza bolǵanyn, birneshe adamnyń jaralanǵanyn jazdy. Ázirge qaza bolǵandar men jaralanǵandar týraly resmi aqparat jariialanǵan joq.
Juma kúni kúndiz Qyrǵyzstannyń Batken jáne Leilek aýdandarynda qyzý shaiqas júrip jatqany, Batken qalasyndaǵy azamattyq nysandarǵa snariad túskeni habarlanǵan. Aqparat quraldarynyń habarlaýynsha, birqatar tájik aýylynda da órt bolǵan.
Qyrǵyzstan tótenshe jaǵdai ministrligi Batken oblysyndaǵy shekaraǵa jaqyn aýdandardan turǵyndardy evakýatsiialaǵan. Halyqty ýaqytsha qonystandyratyn birneshe pýnkt ashylǵan.
Aita keteiik, eki kún buryn qyrǵyz-tájik shekarasynda atys bolyp, keminde bir adamnyń qaza bolǵany, birneshe adamnyń jaralanǵany habarlanǵan. Taraptar oqiǵaǵa bir-birin kinálaǵan.
Tájikstan men Qyrǵyzstan arasyndaǵy 970 kilometr shekaranyń 519 shaqyrymy kelisilgen, qalǵan bóligi áli naqtylanǵan joq. Qyrǵyzdyń Batken oblysy men Tájikstannyń Soǵdy oblysy arasyndaǵy daýly jerde aýyldar, kei tusynda eki eldiń turǵyndarynyń úileri qońsy ornalasqandyqtan ol jerde shekarany naqtylap, belgileý qiyndyq týǵyzǵan. Sonyń saldarynan kórshi eki eldiń turǵyndary men shekarashylary arasynda sýǵa, jerge talas jii bolyp turady. Keide janjal barysynda qarý qoldanylyp, adam ólimine ulasady.
