Qyrǵyzstanda el ekonomikasyn Eýraziialyq ekonomikalyq odaq talaptaryna beiimdeý úshin Qazaqstannan 100 million dollar kóleminde qaryz alý máselesi qaita kóterilýi múmkin, dep habarlaidy Sputnik Qyrǵyzstan.
Bul týraly saiasattanýshy Marat Qazaqpaev aitty. Sarapshynyń pikirinshe, Nursultan Nazarbaev pen Qyrǵyzstannyń eks-prezidenti Almazbek Atambaevtyń arasyndaǵy túsinispeýshilik ózektiligin joǵaltqan. Al qyrǵyz eliniń qazirgi memleket basshysy Sooronbai Jeenbekov Qazaqstannyń tuńǵysh prezidentimen jaqsy bailanys ornatypty.
Qyrǵyz ekonomikasyn Eýraziialyq ekonomikalyq odaq jaǵdaiyna beiimdeý máselesi áli de ózekti, al ony túpkilikti sheshý úshin qarjy qajet.
"Meniń oiymsha, 100 million dollar kóleminde qaryz alý máselesi áli de kóteriledi. Sebebi, qazirgi tańda bilikke týra maǵynasynda Nazarbaevtyń izbasary Toqaev keldi. Demek, Qyrǵyzstanǵa qatysty burynǵy saiasat jalǵasady. Sebebi, ol – kórshiles seriktes. Al Qazaqstan – shynaiy donor. Árine, Atambaev bilikte bolǵan tusta máseleler boldy. Tipti, qos memleket arasynda janjal týyndady", - deidi Marat Qazaqpaev Sputnik Qyrǵyzstan radiosyna bergen suqbatynda.
Sonymen qatar saiasattanýshynyń aitýynsha, Qyrǵyzstannyń qazirgi prezidenti tez arada qazaq elimen til tabysyp ketken.
"Meniń oiymsha, 100 million dollar kóleminde kómek berý máselesi qaita kóteriledi. Men oǵan senimdimin", - dep túiindedi sózin sarapshy.
