Qyrǵyzstan memlekettik ulttyq qaýipsizdik qyzmeti barlaý jáne qarsy barlaý múmkindigin arttyrý úshin zańnamaǵa ózgeris engizýdi usyndy. Bul týraly Azattyqtyń qyrǵyz qyzmeti habarlady.
Túzetýler azamattardyń qupiia hat jazysý, turǵyn úiine qol suǵylmaý, biometriialyq pasporttarǵa qol jetkizý quqyqtaryn qamtidy. Usynys qabyldansa, Qyrǵyzstannyń arnaiy qyzmetterimen seriktes azaptaýdyń aldyn alý jáne sheteldikterge azamattyq berý jónindegi ulttyq ortalyq ókileti ózgeredi.
Ulttyq qaýipsizdik qyzmeti tergeý sýdiasyna zańmen qorǵalatyn quqyqtardy – jazysqan hattar, telefon arqyly sóilesken sózder, poshta, telegraf arqyly jáne basqa joldarmen alysqan habarlardyń qupiialyǵyn saqtaý, turǵyn úige qol suǵylmaý siiaqty quqyqtardy qamtityn sharalardy júrgizýge ruqsat berýdi suraidy.
Sondai-aq qaýipsizdik qyzmeti biometrikalyq derekti azamattyń ruqsatynsyz alýǵa ruqsat berýdi suraǵan. Vedomstvo mundai ótinish aitýyn ózderiniń syrtqy barlaý jáne qarsy barlaý qyzmetiniń "ereksheligimen" túsindirgen.
Azaptaýdyń aldyn alý jónindegi ulttyq ortalyqqa azaptaý isterin esepke almaǵanda qarsy barlaý sharalaryn júrgizý qyzmetine aralasýǵa tyiym salynýy múmkin.
Qyrǵyzstannyń arnaiy qyzmetterimen birige jumys isteitin sheteldikter men azamattyǵy joq adamdarǵa, sondai-aq olardyń otbasylaryna jeńildetilgen tártippen Qyrǵyzstan azamattyǵyn berý de usynyldy. Mundai usynystyń aitylýyna, vedomstvo sózinshe, álgi azamattar turatyn elde olardyń Qyrǵyzstan qaýipsizdik qyzmetimen seriktes ekeni jariia bolsa, olar qamaýǵa alynýy ne ólim jazasyna kesilýi múmkin degen qaýip sebep.
Memlekettik ulttyq qaýipsizdik qyzmeti bul ózgerister zań qaishylyǵyn týdyrmaidy dep sanaidy.
