Qyrǵyzstan parlamentindegi "Bir bol" fraktsiiasynyń lideri Altynbek Sýlaimanov Qyrǵyzstannyń Eýraziia ekonomikalyq odaǵy (EAEO) quramyna kirgenin synady. Azattyqtyń Qyrǵyz qyzmetiniń habarlaýynsha, 15 qarasha kúni Jogorký Keńesh otyrysynda sóilegen depýtat eldiń bul uiymǵa qosylýyn "asyǵys jáne memleket múddesine qaishy qadam" dep atady.
Sýlaimanov buǵan mysalǵa respýblikanyń 2020 jylǵa deiin syrttan kólik kirgizýde óz kedendik salyq tarifin qoldaný múmkindigi bolǵanyn, soǵan qaramastan tarif kóterilgenin keltirdi.
"2014 jyly Qyrǵyzstanǵa 110 myń kólik kirgizildi. 2015 jyly - eki-aq myń kólik. 2016 jyly 68 myń, 2017 jyly - 69 myń kólik kirdi. On myń adam jumysynan aiyryldy. Kóliktiń jartysyn qazaqstandyqtar satyp aldy. Endi biz olardan satyp alamyz. Osy jyldary biýdjetke bes milliardtan 15 milliard somǵa deiingi mólsherde qarjy túser edi, baǵa aiyrmasynan qanshama azamatymyz tabys tapqan bolar edi" dedi Sýlaimanov.
Depýtat keden salyǵynyń qymbattaǵanyna eks-premer Temir Sarievti kinálady.
14 qarashada Temir Sariev beine úndeýinde Qyrǵyzstannyń EAEO-ǵa qosylýy "tarihi turǵydan durys sheshim bolǵanyn, eldiń budan kóp nárse utqanyn málimdegen. Ol kedendik salyq pen alymǵa qatysty 2020 jylǵa deiin jeńildik kezeńin durys paidalaný úshin úkimet 2015 jyly tarifterdi birtindep kóbeitýge sheshim qabyldaǵanyn aitty.
2018 jyly shildede úkimet syrttan kirgiziletin, benzin jáne dizelmen júretin kólikterge kedendik baj salyǵy men alymdy 2014 jylǵy deńgeiine deiin tómendetken.
EAEO-men jasalǵan kelisimniń 26-tarmaǵynda kelisim kúshine engen kúnnen bastap jáne 2020 jyldyń 1 qańtaryna deiin Qyrǵyzstanda qujatta belgilengen kedendik alym men baj salyǵy qoldanylmaityny aitylǵan. Iaǵni, Qyrǵyzstan 2020 jyldyń 1 qańtaryna deiin óz tarifin belgileý quqyǵyn ielengen.
Qyrǵyzstan EAEO-ǵa 2015 jyly 12 tamyzda qosylǵan.
