Qyrǵyz-tájik shekarasyndaǵy Kým-Mazar eldi mekeninde taǵy atys boldy. Aqparatqa qaraǵanda, kikiljiń shekarasy áli anyqtalmaǵan daýly aýmaqta bolǵan, dep jazady Azattyq.
Qyrǵyzstan ulttyq qaýipsizdik komitetine qarasty shekara qyzmetiniń habarlaýynsha, 24 shildede shekara mańynda turatyn tájik aýylynyń turǵyndary qyrǵyz jaǵynyń kelisiminsiz "aýmaqty qumnan tazartý jumystaryn" júrgize bastaǵan. Oqiǵa ornyna qyrǵyz shekarashylary, jergilikti bilik ókilderi men turǵyndar jinalǵan. Qyrǵyz jaǵy jumysty toqtatýdy talap etken kezde tájik jaǵy oryndamaǵan.
"Onymen qoimai, Tájikstan azamattary Qyrǵyzstan azamatyn uryp-soǵýǵa tyrysty. Budan soń eki eldiń turǵyndary tóbelesip, bir-birine tas atqan" dep habarlady Qyrǵyzstan shekara qyzmeti.
Qyrǵyz tarabynyń aitýynsha, tóbeles kezinde tájik shekarashylary qyrǵyz jaǵyna qarai oq atqan. Buǵan jaýap retinde qyrǵyz shekarashylary da oq atqan. Shekara qyzmetiniń habarlaýynsha, qyrǵyzdar jaǵynan jaralanǵandar joq.
Al tájiktiń Chorkýh aýylynyń turǵyndary qyrǵyz shekarashylary birinshi oq atty dep qyrǵyz tarabyn kinálady. Olar Azattyqtyń Tájik qyzmetine oqiǵa demalys ornyn tazalaý kezinde bolǵanyn habarlaǵan. Turǵyndardyń sózine qaraǵanda, atys shamamen on minýtqa sozylǵan. Jergilikti bilik aqparatty rastap, oqiǵa ornyna qala ákimdiginiń ókilderi barǵanyn aitty.
Azattyqtyń Tájik qyzmetiniń habarlaýynsha, oqiǵa kezinde 19 jastaǵy tájik shekarashysy Shýhrat Kýrbonov jaralanǵan. tarabynan bir shekarashanyń jaralanǵany habarlandy. Ol Isfara qalasynyń ortalyq aýrýhanasyna jetkizilgen.
Aqparatqa qaraǵanda, qazir eki jaqtyń bilik ókilderi máseleni talqylap jatyr. Oqiǵa ornynda jaǵdai turaqty dep aitylady.
Qyrǵyz-tájik shekarasynyń jalpy uzyndyǵy – 970 shaqyrym. Qazirge deiin 504 kilometrine delimitatsiia jáne demarkatsiia júrgizilgen.
Al shekaranyń kelisilmegen tustary sondaǵy eldi mekenderdegi sý, jer jáne áli anyqtalmaǵan shekarany kesip ótý máseleleri daýǵa jii sebep bolady. Daýdyń sońy janjalǵa ulasyp, taraptar bir-birine tas atady, keide qarýdan oq atady.
28-30 sáýirde qyrǵyz-tájik shekarasynda bolǵan janjaldan 50-den astam adam qaza bolǵan, júzdegen adam zardap shekken. (Qyrǵyz jaǵy 36 qyrǵyz azamaty, tájik taraby 19 adamnyń opat bolǵanyn habarlady). Eki jaq bir-birin jaǵdaidy ýshyqtyrdy dep aiyptap, qylmystyq ister qozǵaǵan.
8 shildede shekarada taǵy atys bolyp, sonyń saldarynan bir qyrǵyz shekarashasy mert bolǵan.
