Foto: Pexels.com
Sáýir aiynyń sońynan bastap Qyrǵyz Respýblikasy Qazaqstanǵa Talas ózeni arqyly taǵy 400 mln jáne Shý ózeni arqyly 180 mln tekshe metr sý jiberedi, dep habarlaidy Ult.kz.
QR Sý resýrstary jáne irrigatsiia ministri Nurjan Nurjigitov pen Qyrǵyz Respýblikasynyń Ministrler kabineti tóraǵasynyń orynbasary – sý resýrstary, aýyl sharýashylyǵy jáne qaita óńdeý ónerkásibi ministri Baqyt Torobaev Shý jáne Talas ózenderindegi memleketaralyq sý sharýashylyǵy qurylymdaryn paidalaný jónindegi qazaq-qyrǵyz komissiiasynyń 35-shi otyrysynda osy jóninde kelisimge keldi.
Bul sý Jambyl oblysyndaǵy aýyl sharýashylyǵy alqaptaryn sýarýǵa jumsalady. Sýarý maýsymy bastalǵan sáýir aiynyń ózinde-aq 45 mln tekshe metr sý berildi.
Sonymen qatar taraptar qorshaǵan ortany qorǵaý jáne sý sapasyn baqylaý boiynsha birlesken jumys tobynyń qyzmetin talqylady.
Otyrysqa sondai-aq Syrtqy ister ministrligi, Tótenshe jaǵdailar ministrligi, Ekologiia jáne tabiǵi resýrstar ministrligi men Jambyl oblysy ákimdigi ókilderi qatysty. Komissiianyń teń tóraǵalary – QR Sý resýrstary jáne irrigatsiia vitse-ministri Nurlan Aldamjarov jáne Qyrǵyz Respýblikasynyń Sý resýrstary qyzmetiniń direktory, ministr orynbasary Nurlan Jumaev.
«Byltyr qyrǵyz áriptesterimizben birlesken jumystyń arqasynda Jambyl oblysynyń diqandaryn sýarmaly sýmen tolyq qamtamasyz ettik. Mysaly, Talas ózeni arqyly Qazaqstanǵa josparlanǵan 380 mln tekshe metrdiń ornyna 418 mln tekshe metr sý keldi. Al Shý ózeni arqyly 165,3 mln tekshe metr sý keldi, bul bir jyl burynǵy kólemmen salystyrǵanda 29,7 millionǵa artyq», – dedi QR Sý resýrstary jáne irrigatsiia ministri Nurjan Nurjigitov.
