Qyrǵyzstan parlamentindegi kópshilik koalitsiiasy osyǵan deiin premerlikke usynylǵan Sadyr Japarov kandidatýrasyn resmi túrde maquldady. Koalitsiia tóraǵasy Isa Omýrkýlov sheshim parlament komitetine jiberiledi dedi.
Jogorký keńesh spikeri Kanat Isaevtyń aitýynsha, reglament boiynsha premer-ministrdi parlamentte kópshilik bolyp otyrǵan koalitsiia usynýy tiis. Alaida 10 qazanda ótken depýtattardyń kezekten tys otyrysynda bul protsedýra saqtalmaǵan. Sondyqtan sársenbi kúni koalitsiia onyń kandidatýrasyn usynyp, resmi túrde maquldaǵan.
Ótken senbi kúni Jogorký keńesh depýtattarynyń bir bóligi "Ala-Archa" rezidentsiiasyna jinalyp, Sadyr Japarov bastaǵan úkimet quramyn bekitken edi. Alaida prezident Sooronbai Jeenbekov úkimet quramyn anyqtaý týraly qaýlyny parlamentke qaitarǵan. Onyń aitýynsha, 10 qazanda ótken Jogorký keńesh jiynynda kvorým bolmaǵan.
Azattyqtyń Qyrǵyz qyzmetiniń habarlaýynsha, 14 qazanda Sadyr Japarov memlekettik qyzmetke jańa adamdardy tarta bastaǵan. Sársenbi kúni onyń buiryǵymen úkimet apparaty jetekshisiniń mindetin atqarýshy, ishki ister ministri mindetin atqarýshy taǵaiyndalǵan.
Qyrǵyzstanda 4 qazanda ótken parlament sailaýynan keiin elde saiasi daǵdarys týyndaǵan. Sailaý nátijesin joiýdy talap etken narazylyq aktsiiasynyń sońy tártipsizdikke ulasqan. 6 qazanǵa qaraǵan túni demonstranttar parlament pen prezident apparaty ornalasqan "Aq úidi" basyp alǵan. Elde saiasi kúshter arasynda bilikke talas qyzǵan.
