قىرعىزستان پارلامەنتٸندەگٸ كٶپشٸلٸك كواليتسيياسى وسىعان دەيٸن پرەمەرلٸككە ۇسىنىلعان سادىر جاپاروۆ كانديداتۋراسىن رەسمي تٷردە ماقۇلدادى. كواليتسييا تٶراعاسى يسا ومۋركۋلوۆ شەشٸم پارلامەنت كوميتەتٸنە جٸبەرٸلەدٸ دەدٸ.
جوگوركۋ كەڭەش سپيكەرٸ كانات يساەۆتىڭ ايتۋىنشا, رەگلامەنت بويىنشا پرەمەر-مينيستردٸ پارلامەنتتە كٶپشٸلٸك بولىپ وتىرعان كواليتسييا ۇسىنۋى تيٸس. الايدا 10 قازاندا ٶتكەن دەپۋتاتتاردىڭ كەزەكتەن تىس وتىرىسىندا بۇل پروتسەدۋرا ساقتالماعان. سوندىقتان سەرسەنبٸ كٷنٸ كواليتسييا ونىڭ كانديداتۋراسىن ۇسىنىپ, رەسمي تٷردە ماقۇلداعان.
ٶتكەن سەنبٸ كٷنٸ جوگوركۋ كەڭەش دەپۋتاتتارىنىڭ بٸر بٶلٸگٸ "الا-ارچا" رەزيدەنتسيياسىنا جينالىپ, سادىر جاپاروۆ باستاعان ٷكٸمەت قۇرامىن بەكٸتكەن ەدٸ. الايدا پرەزيدەنت سوورونباي جەەنبەكوۆ ٷكٸمەت قۇرامىن انىقتاۋ تۋرالى قاۋلىنى پارلامەنتكە قايتارعان. ونىڭ ايتۋىنشا, 10 قازاندا ٶتكەن جوگوركۋ كەڭەش جيىنىندا كۆورۋم بولماعان.
ازاتتىقتىڭ قىرعىز قىزمەتٸنٸڭ حابارلاۋىنشا, 14 قازاندا سادىر جاپاروۆ مەملەكەتتٸك قىزمەتكە جاڭا ادامداردى تارتا باستاعان. سەرسەنبٸ كٷنٸ ونىڭ بۇيرىعىمەن ٷكٸمەت اپپاراتى جەتەكشٸسٸنٸڭ مٸندەتٸن اتقارۋشى, ٸشكٸ ٸستەر مينيسترٸ مٸندەتٸن اتقارۋشى تاعايىندالعان.
قىرعىزستاندا 4 قازاندا ٶتكەن پارلامەنت سايلاۋىنان كەيٸن ەلدە ساياسي داعدارىس تۋىنداعان. سايلاۋ نەتيجەسٸن جويۋدى تالاپ ەتكەن نارازىلىق اكتسيياسىنىڭ سوڭى تەرتٸپسٸزدٸككە ۇلاسقان. 6 قازانعا قاراعان تٷنٸ دەمونسترانتتار پارلامەنت پەن پرەزيدەنت اپپاراتى ورنالاسقان "اق ٷيدٸ" باسىپ العان. ەلدە ساياسي كٷشتەر اراسىندا بيلٸككە تالاس قىزعان.
