Qyrǵyz parlamenti men onyń spikeri depýtattar isin tergeýge aralaspaidy. Qazaqstanda ustalǵan qyrǵyz depýtaty Damirbek Asylbek ýýlý tóńiregindegi máselege qyrǵyz parlamentiniń baspasóz qyzmetiniń jetekshisi Ibraim Nýrakýn ýýlý osylai dep málimdedi. Bul týraly centralasian.org habarlady.
Onyń aitýynsha, bul is jogorký keneshke emes, depýttattyń ózine ǵana qatysty.
"Depýtatqa qatysty qylmystyq is qozǵalyp, tergeý nemese sot júrip jatsa, jogorký kenesh pen onyń spikeri buǵan aralaspaidy. Kinási dáleldengen jaǵdaida, depýtat jazasyn ózi tartady", — dedi Nýrakýn ýýlý.
"Qyrǵyzstan" parlamenttik fraktsiiasy kezekten tys jinalys ótkizgen. Fraktsiia hatshylyǵy atap ótkendei, Damirbek Asylbek ýýlý Qyrǵyzstan men Qazaqstan atynan kúresten jarystarǵa qatysyp, sporttyń osy túriniń damýyna úlken úles qosqan.
"Aldyn ala málimet boiynsha, depýtattyń aiyptaýlarǵa qatysy joqtyǵy týraly aqparat bar. "Qyrǵyzstan" fraktsiiasy syrtqy ister ministrligi men quqyq qorǵaý organdarymen tyǵyz bailanys ustap otyr. Biz bul isti Qazaqstannyń quzyrly organdary zań aiasynda, Qyrǵyzstan azamattarynyń quqyqtaryn buzbai zertteidi dep senemiz", — delingen habarlamada.
Qazaqstannyń Ulttyq qaýipsizdik qyzmeti jáne Jemqorlyqpen kúres jónindegi Ulttyq biýro 15-16 aqpanda Almaty, Jambyl jáne Ońtústik Qazaqstan oblystarynda jáne Almaty qalasynda arnaiy operatsiia júrgizdi. Sonyń nátijesinde 35 adam ustalǵan. Olardyń arasynda keden jáne quqyq qorǵaý organdary qyzmetkerleri, brokerler, qylmys áleminiń ókilderi bar. Olar halyq tutynatyn taýarlardy kontrabandalyq jolmen tasymaldaǵany anyqtaldy.
Qazaqstandyq kúsh qurylymdary ustaǵan Qyrǵyzstannyń úsh azamaty eki ai merzimge qamaýǵa alyndy.
