QR Ishki ister ministrliginiń tergeý izoliatorlary men qylmystyq-atqarý júiesi mekemelerinde ustalatyn adamdardy meditsinalyq qamtamasyz etý salasyndaǵy memlekettik saiasatty úilestirý jónindegi fýnktsiialar men ókilettikter tolyǵymen Densaýlyq saqtaý ministrligine beriledi. Bul týraly QR Ishki ister ministrliginiń ókili Shuǵyla Berikqyzy málim etti, dep habarlaidy "Ult aqparat".
Memleket basshysy Qasym-Jomart Toqaev 19 shildede «Qazaqstan Respýblikasynyń memlekettik basqarý júiesin jetildirý jónindegi sharalar týraly» Jarlyqqa qol qoidy.
«Jarlyqqa sáikes IIM-niń tergeý izoliatorlary men qylmystyq-atqarý júiesi mekemelerinde ustalatyn adamdardy meditsinalyq qamtamasyz etý salasyndaǵy memlekettik saiasatty úilestirý jónindegi fýnktsiialar men ókilettikter tolyǵymen Densaýlyq saqtaý ministrligine beriledi», - dedi Sh. Berikqyzy IIM-de onlain ótken baspasóz máslihatynda.
Buǵan deiin IIM-niń keńeitilgen alqa otyrysynda Memleket basshysy otandyq penitentsiarlyq júieniń jaǵdaiyn jaqsartý qajettigin aitqan bolatyn.
Osyǵan bailanysty IIM Qylmystyq-atqarý júiesiniń barlyq reformalarynyń negizgi basymdyqtary, birinshi kezekte, adam quqyqtaryn saqtaý men qorǵaýdy, sottalǵandardy ustaýdyń jaǵdailaryn jaqsartýdy, penitentsiarlyq infraqurylymdy jańǵyrtýdy aiqyndady.
«Ishki ister ministrligin tán emes fýnktsiialardan bosatý jáne penitentsiarlyq júieni jańǵyrtý jónindegi reforma sheńberinde sottalǵandardy meditsinalyq qamtamasyz etý fýnktsiialaryn Densaýlyq saqtaý ministrliginiń qaramaǵyna berý zertteýdiń, diagnostikanyń jáne emdeýdiń qazirgi zamanǵy ádisterine keńinen qol jetkizýge múmkindik beredi. Sondai-aq, meditsina qyzmetkerleri mekemelerdiń ákimshiligine táýeldi bolmaidy, bul bolýy múmkin zańsyz áreketterdi jasyrýdy joiady», – dep atap ótken edi Ishki ister ministri Erlan Turǵymbaev.
QAJ-daǵy meditsinalyq qamtamasyz etý júiesi qyzmetter resýrstary, sapasy jáne baqylaý turǵysynan azamattyq sektordyń meditsinalyq qyzmet kórsetýmen teń jaǵdaida emes ekenin atap ótken jón.
Negizgi másele – meditsina qyzmetkerleriniń jetispeýshiligi, bul rette QAJ mekemeleriniń meditsina qyzmetkerleriniń jalaqysy densaýlyq saqtaýdyń azamattyq sektoryndaǵy meditsina qyzmetkerleriniń jalaqysymen salystyrǵanda áldeqaida tómen.
Sondai-aq, azamattyq densaýlyq saqtaý salasynda aitarlyqtai materialdyq-tehnikalyq baza jáne praktikalyq tájiribesi mol bilikti meditsina mamandary bar.
Osyǵan bailanysty, Quqyq qorǵaý jáne sot júielerin reformalaý jónindegi komissiia IIM-niń QAJ mekemelerinde ustalatyn adamdardy meditsinalyq qamtamasyz etýdi Densaýlyq saqtaý ministrliginiń qaramaǵyna berý týraly usynysyn qoldady.
Bul shara bas bostandyǵynan aiyrý oryndarynda jazasyn ótep jatqan adamdardy meditsinalyq qamtamasyz etýdi halyqaralyq standarttarǵa sáikes keltirýge múmkindik beredi.
Óz kezeginde halyqaralyq sarapshylar men quqyq qorǵaýshylar IIM-niń qylmystyq-atqarý júiesin reformalaý aiasynda jasaǵan kezekti qadamyn joǵary baǵalady.
«Uiymnyń Bas Assambleiasy qabyldaǵan BUU-nyń eń tómengi standartty erejelerine sáikes, sottalǵandar qoǵamda bar meditsinalyq-sanitarlyq qyzmet kórsetý standarttarymen qamtamasyz etilýi kerek. Sondyqtan, kúzetpen ustalatyn adamdardy meditsinalyq qamtamasyz etý fýnktsiialaryn azamattyq vedomstvoǵa berý – bul shyn máninde Qazaqstandaǵy mańyzdy tarihi oqiǵa», – dep Ortalyq Aziiadaǵy PRI ókildiginiń basshysy Janna Nazarova atap ótip, Qazaqstan Respýblikasy IIM-niń penitentsiarlyq júie salasyndaǵy jumysyn erekshe baǵalady.
