Sailau Talks-2021 sharasynda sarapshylar alǵash ret partiialyq sailaý tizimine áielder men jastarǵa 30%-dyq mindetti kvota qaralǵanyna jáne áielderdiń saiasi protsesterge qatysýyna qatysty pikir bildirdi, dep habarlaidy QazAqparat.
«Elimizdegi halyqtyń 51% – áielder bolsa, 21% – jastar. Sailaý nátijesi shyqqannan keiin partiia áielder men balalardyń múddesin qorǵaityn ókilderdi tanystyratyn bolady dep oilaimyn. Memleket basshysy Qasym-Jomart Toqaev 2021 jyldyń basynda saiasi reformalardyń ekinshi paketi qabyldanatynyn aitty. Sol kezde ne bolatynyn kóremiz. Biz aldymen shara qabyldaimyz, sosyn ol qalai júzege asqanyn baiylaimyz, iaǵni evoliýtsiialyq joldy júrip ótemiz. Bul – óte jaqsy sheshim», - deidi saiasattanýshy Juldyzai Ysqaqova.
Qazaqstan strategiialyq zertteýler institýtynyń bólim basshysy Alýa Joldybalinanyń aitýynsha, 30% kvota bólindi eken dep barlyq áiel saiasatqa júgirmeidi.
«Keibir áiel otbasylyq ómirin ǵana tańdasa, endi biri saiasatqa aralasqysy keledi. 30%-dyq kvota – ýaqytsha is-shara shyǵar. Bul – áielderdiń saiasattaǵy belsendiligin arttyrý sharasy. Kóp memleket osyndai kvotany ýaqytsha engizip, keiin bas tartady. Jalpy otbasyn da, jumysyn da qatar alyp júrip, barlyǵyna úlgerýge tyrysatyn áielder bolady. 30% kvotany qoǵamdaǵy ózekti máselelerdi sheshýge áielderdiń atsalysýynyń bir mehanizmi retinde qaraý kerek», - deidi ol.
