Kúzde koronavirýstyń ekinshi tolqyny kelse, karantindik sharalar qabyldanýy múmkin. Bul týraly QR Densaýlyq saqtaý vitse-ministri Liýdmila Biýrabekova málim etti, dep habarlaidy QazAqparat.
Onlain tártipte ótken baspasóz máslihatynda kúzde koronavirýstyń ekinshi tolqyny bolatyndyǵy týraly pikirlerge qatysty suraq qoiyldy. Bul turǵyda kásiporyndardyń jumysyna shekteý engizý múmkindigi jaiynda suraldy.
«Shynymen de kúzde biz virýstyń ekinshi tolqyny kelýi múmkin ekenin joqqa shyǵarmaimyz. Alaida kúzde qabyldanatyn sharalar jaǵdaiǵa qarai iske asyrylady, iaǵni sol kezdegi epidemiologiialyq ahýal nazarǵa alynady. Kúzde qandai da bir karantindik sharalar qabyldanýy múmkin, bul qadamdar indettiń taralýy qaýpine bailanysty bolady», - dedi vitse-ministr.
Budan buryn habarlanǵandai, QR DSM Qoǵamdyq densaýlyq saqtaý ulttyq ortalyǵy direktory Damir Kóbjasarov koronavirýstyń ekinshi tolqyny qai kezde kelýi múmkin ekenin aitty.
«Indet juqtyrý kórsetkishteri artýynyń ekinshi kezeńi kúz merziminiń ekinshi bóligine kelýi múmkin. El halqy virýstyń bar ekenin umytpaýy kerek. Bul indet barsha álemde tolyqtai joiylmady. Keibir adamdarda bul aýrý eshbir belgilersiz bolady, keiinnen bul infektsiia aǵzasy indetke sezimtal kisilerge juǵýy múmkin», - dedi D. Kóbjasarov onlain tártipte ótken brifingte.
