Búgingi tańda 83 jyldyq tarihy bar Almaty qalasynyń Memlekettik qýyrshaq teatry – respýblikamyzdaǵy eń iri óner ujymdarynyń biri. Óner oshaǵy búginde talantty artister men qýyrshaq sheberleriniń, rejisserlerdiń, sýretshilerdiń birneshe urpaǵyn tárbielep shyǵardy. Elimizde jáne shet elde ótken Halyqaralyq, respýblikalyq teatr festivalderinde biik belesterdi baǵyndyrǵan ujymnyń alǵa qoiǵan baǵyty men baǵdary da aiqyn. Ol – qazaqtyń qýyrshaq teatry ónerin órkendetý, keshegi men búgingi ómir arasyn ónerdiń biik shyńy arqyly shynaiy kórsete bilý.
Bolashaǵymyzdyń jarqyn, keler urpaqtyń bilimdi, saliqaly bolýy bala tárbiesine tikelei bailanysty ekeni haq. Sol sebepti de, álemdik básekege sai, rýhani turǵydan bai, jan-jaqty, bilimpaz urpaq tárbieleý jolynda QÝYRShAQ teatry aianbai eńbek etýde. 82-shi maýsymnyń ózinde elordamyz Astanada, elimizdiń basqa da aimaqtarynda gastroldik saparmen bolyp, kórermen yqylasyna keńinen bólendi. Bishkek (Qyrǵyzstan), Moldaviia, Ankara (Túrkiia), Tatarstan elderinde ótken halyqaralyq teatr festivalderine qatysyp, joǵary marapattarǵa ie boldy.
83-shi maýsymyn jaqynda ashqan teatr ujymy kezekti III HALYQARALYQ ANKARA festivaline shaqyrtý aldy. Úshinshi ret ótkeli otyrǵan festivaldiń uiymdastyrýshylary KUKSADER jáne THEATRE TEMPO uiymdary. Atalmysh óner merekesi ústimizdegi jyldyń qazan aiynyń 19-27 aralyǵynda ótedi. Festivaldiń basty maqsaty – qýyrshaq teatry óneriniń kókjiegin keńeitip, halyqaralyq standartqa sai ete otyryp, kásibi teatr mamandary men túrik sýretshileri, rejisserleri, prodiýserleri men qarapaiym óner súier qaýymnyń talabynan shyǵý, jańa tynysyn tanytý. III Halyqaralyq Ankara teatr festivaline biyl 4 túrkiialyq jáne 6 sheteldik óner ujymdary qatysyp, baqtaryn synaidy. Festival barysynda qoiylymdardan tys arnaiy dárister, seminarlar oqylyp, qýyrshaq teatr ónerine bailanysty kórmeler uiymdastyrylady.
Memlekettik QÝYRShAQ teatry festival qatysýshylary men qonaqtary nazaryna «Qýyrshaq dýman» (avt. jáne rej.: Q.Eshmuratova, S.Shúkirov) jáne «Arystannyń úreiin qalai emdeý kerek?» (avt.: M.Dlgecheva, rej.: E.Toteva-Andotova) qoiylymdaryn usynady.
Aita keterlik jait, teatr ujymy 2017 jyldyń 28 shilde men 7 tamyz aralyǵynda Ankara qalasynda (Túrkiia) ótken Halyqaralyq teatr festivalinde «Qýyrshaq dýman» (rej.: Q.Eshmuratova) qoiylymymen qatysyp, Qazaqstan Respýblikasynyń Túrkiia Respýblikasyndaǵy elshisiniń atynan «Qazaqstan men Túrkiia arasyndaǵy diplomatiialyq qarym-qatynastardyń 25 jyldyǵy aiasynda Túrkiia Respýblikasynda qazaq mádenieti men ónerin tanytýǵa qosqan úlesi úshin» atty arnaiy alǵys hatpen marapattalǵan.
