Biylǵy 9 aida kúieýinen zábir kórgen 100 myńnan astam áiel politsiiaǵa qońyraý shaldy. Bul týraly QR Ishki ister ministri Marat Ahmetjanov Shyǵys Qazaqstan oblysynyń turǵyndarymen eseptik kezdesýde aitty, dep habarlaidy QazAqparat.
Ishki ister ministri Marat Ahmetjanov turmystyq zorlyq-zombylyqqa tosqaýyl qoiý úshin qandai sharalar atqarylyp jatqanyn jetkizdi.
«Turmystyq zorlyq-zombylyq – halyqty tolǵandyryp otyrǵan eń negizgi máselelerdiń biri. Osy týraly Memleket basshysy Joldaýynda da aityp, bizge naqty tapsyrmalar berdi. Pandemiia kezinde úidegi osyndai faktiler odan saiyn kóbeiip ketken bolatyn. Keibir belsendiler bul quqyq buzýshylyqty qylmys sanatyna jatqyzý kerektigin aityp jatyr. Biraq ótkenge kóz júgirtsek, buǵan deiin qylmys qataryna qosqan kezimiz boldy. Keiin qaitadan quqyq buzýshylyq sanatyna aýystyrǵan edik. Sondyqtan máseleni sheshýdiń basqa jolyn qarastyrǵan jón», - dedi vedomstvo basshysy.
Ministrdiń aitýynsha, qazir turmystyq zorlyq-zombylyqty barynsha azaitýǵa den qoiylýda. Degenmen birqatar kedergi bar. Osy jyldyń 9 aiynda Qazaqstanda «102» arnasyna úide kúieýinen zábir kórip jatqanyn aityp 100 myńnan astam áiel habarlasqan.
«Politsiia qyzmetkerleri birden oqiǵa oryndaryna bardy. Alaida áielderdiń 62 paiyzy jubaiynyń ústinen aryz jazýdan bas tartqan. Sonyń saldarynan saqshylar tek túsindirý jumystaryn júrgizip, eshqandai shara qoldana almady. Arnaiy taldaý júrgize kele, biz birqatar sheshimge keldik. Aryzsyz-aq jaýapqa tartý quqyǵyn engizý kerek. Iaǵni, eger áielin uryp-soqqan fakti anyqtalsa, onda kúieýin zań sheńberinde jazalaý qajet. Al eger burynǵydai bola berse, ózin jazasyz sezingen erkek kúsh kórsetýin doǵarmaidy», - dedi Marat Ahmetjanov.
