بيىلعى 9 ايدا كٷيەۋٸنەن زەبٸر كٶرگەن 100 مىڭنان استام ەيەل پوليتسيياعا قوڭىراۋ شالدى. بۇل تۋرالى قر ٸشكٸ ٸستەر مينيسترٸ مارات احمەتجانوۆ شىعىس قازاقستان وبلىسىنىڭ تۇرعىندارىمەن ەسەپتٸك كەزدەسۋدە ايتتى, دەپ حابارلايدى قازاقپارات.
ٸشكٸ ٸستەر مينيسترٸ مارات احمەتجانوۆ تۇرمىستىق زورلىق-زومبىلىققا توسقاۋىل قويۋ ٷشٸن قانداي شارالار اتقارىلىپ جاتقانىن جەتكٸزدٸ.
«تۇرمىستىق زورلىق-زومبىلىق – حالىقتى تولعاندىرىپ وتىرعان ەڭ نەگٸزگٸ مەسەلەلەردٸڭ بٸرٸ. وسى تۋرالى مەملەكەت باسشىسى جولداۋىندا دا ايتىپ, بٸزگە ناقتى تاپسىرمالار بەردٸ. پاندەمييا كەزٸندە ٷيدەگٸ وسىنداي فاكتٸلەر ودان سايىن كٶبەيٸپ كەتكەن بولاتىن. كەيبٸر بەلسەندٸلەر بۇل قۇقىق بۇزۋشىلىقتى قىلمىس ساناتىنا جاتقىزۋ كەرەكتٸگٸن ايتىپ جاتىر. بٸراق ٶتكەنگە كٶز جٷگٸرتسەك, بۇعان دەيٸن قىلمىس قاتارىنا قوسقان كەزٸمٸز بولدى. كەيٸن قايتادان قۇقىق بۇزۋشىلىق ساناتىنا اۋىستىرعان ەدٸك. سوندىقتان مەسەلەنٸ شەشۋدٸڭ باسقا جولىن قاراستىرعان جٶن», - دەدٸ ۆەدومستۆو باسشىسى.
مينيستردٸڭ ايتۋىنشا, قازٸر تۇرمىستىق زورلىق-زومبىلىقتى بارىنشا ازايتۋعا دەن قويىلۋدا. دەگەنمەن بٸرقاتار كەدەرگٸ بار. وسى جىلدىڭ 9 ايىندا قازاقستاندا «102» ارناسىنا ٷيدە كٷيەۋٸنەن زەبٸر كٶرٸپ جاتقانىن ايتىپ 100 مىڭنان استام ەيەل حابارلاسقان.
«پوليتسييا قىزمەتكەرلەرٸ بٸردەن وقيعا ورىندارىنا باردى. الايدا ەيەلدەردٸڭ 62 پايىزى جۇبايىنىڭ ٷستٸنەن ارىز جازۋدان باس تارتقان. سونىڭ سالدارىنان ساقشىلار تەك تٷسٸندٸرۋ جۇمىستارىن جٷرگٸزٸپ, ەشقانداي شارا قولدانا المادى. ارنايى تالداۋ جٷرگٸزە كەلە, بٸز بٸرقاتار شەشٸمگە كەلدٸك. ارىزسىز-اق جاۋاپقا تارتۋ قۇقىعىن ەنگٸزۋ كەرەك. ياعني, ەگەر ەيەلٸن ۇرىپ-سوققان فاكتٸ انىقتالسا, وندا كٷيەۋٸن زاڭ شەڭبەرٸندە جازالاۋ قاجەت. ال ەگەر بۇرىنعىداي بولا بەرسە, ٶزٸن جازاسىز سەزٸنگەن ەركەك كٷش كٶرسەتۋٸن دوعارمايدى», - دەدٸ مارات احمەتجانوۆ.
