28 naýryz kúni ótken Senat otyrysynda depýtat Tóleýbek MUQAShEV Qazaqstan Respýblikasynyń Premer-Ministri A.U. Maminniń atyna depýtattyq saýal joldady.
Qazaqstan Respýblikasynyń
Premer-Ministri
A.U.MAMINGE
Qurmetti Asqar Uzaqbaiuly!
Ózderińiz biletindei, biylǵy 25 naýryzda Mańǵystaý oblysyndaǵy «Qalamqas» ken ornyndaǵy 8237 uńǵyda gaz ben sýdyń birneshe márte joiqyn atqylaýynan keiin órt boldy.
Strategiialyq mańyzy bar nysanǵa ǵana emes, sonymen birge Kaspii aimaǵynyń ekologiiasyna qatty ziian keldi.
Bul jaǵdai «Qalamqas» ken ornynda munai barlaýmen jáne óndirýmen ainalysatyn kompaniialardyń ǵana emes, sondai-aq jer qoinaýyn paidalaný, órtten jáne ónerkásip qaýipsizdigi salasyndaǵy memlekettik saiasatty qalyptastyrý men iske asyrý máseleleri zań júzinde júktelgen memlekettik organdardyń olqylyqtaryna bailanysty oryn aldy dep oilaimyn. Onyń ústine, biylǵy jylǵy 13 naýryzda oryn alǵan apatty oqshaýlaýǵa qajetti ýaqytty jiberip alyp, apatty joiýǵa qajetti kúshter men quraldardyń áleýeti paidalanylmady, uńǵyda órt shyqqannan keiin ǵana máselege nazar aýdarydy. Jer qoinaýyn qorǵaý men paidalaný erejeleri buzylǵany aidan anyq.
Memlekettik jáne jeke órt sóndirý kúshteriniń osyndai apatty joiýǵa qajetti eshqandai quraldary men múmkindikteri joq ekenin aita ketken jón.
Joǵaryda aitylǵan jaǵdai qaýipti óndiris obektilerindegi jazataiym oqiǵalar men jaǵdaiattardan týyndaityn qaýipti óndiristik kórinisterdiń ziiandy áserlerin boldyrmaýǵa arnalǵan ónerkásip qaýipsizdigi salasyndaǵy tiisti memlekettik qadaǵalaý júrgizilmegenin kórsetti.
Sonymen qatar qaýipti tehnikalyq quraldardy paidalanatyn qaýipti óndiris obektileri men uiymdardyń apattar men olardyń zardaptaryn joiý jáne oqshaýlaý jumystaryn júrgizýge daiyndyǵyn memlekettik baqylaý álsiz ekeni baiqalyp otyr.
Sondai-aq, apatta qutqarý qyzmeti men quralymdar jumysynyń arasynda, tótenshe jaǵdailardy joiýǵa arnalǵan qajetti kúshter men quraldardy jedel túrde tartý maqsatyndaǵy memlekettik emes órtke qarsy qyzmetterdiń úilesimi joq.
Oǵan qosa, negizgi qyzmeti osyndai deńgeidegi órtti joia alatyn, respýblikanyń barlyq ónerkásipti aimaqtarynda jumys isteitin ári 13 filialy bar elimizdegi jalǵyz memlekettik kásibi áskerilendirilgen avariialyq-qutqarý qyzmeti 2018 jyly jekeshelenip ketti.
Úkimettiń jer qoinaýyn paidalaný salasyndaǵy memlekettik saiasattyń negizgi baǵyttaryn belgileitinin, sondai-aq órt pen ónerkásiptik qaýipsizdigin qamtamasyz etetinin eskere otyryp, birinshiden, jazataiym oqiǵalardyń sebepterin tergep-tekserýdi jáne aiqyndaýdy qajet dep sanaimyz. Sonymen qatar zańnamada belgilengen tártipte mynandai ózekti máselelerge jaýap berýdi suraimyz:
1. Osyndai jaǵdailarǵa jol bermeý úshin Úkimet bolashaqta qandai sharalar qabyldaýdy josparlap otyr?
2. Elimizdegi kásibi apatta qutqarý qyzmetteri men tótenshe jaǵdailardy jáne olardyń zardaptaryn joiý jónindegi bólimshelerdiń respýblikadaǵy barlyq qaýipti óndiris nysandaryna qyzmet kórsetý jaǵdaiy qandai?
3. Kásibi apatta qutqarý qyzmetteri men quralymdarynyń daiyndyǵy, onyń ishinde apatta qutqarý jumystaryn júrgizý úshin qajetti tehnikamen, jabdyqtarmen, saqtandyrý quraldarymen jáne jeke qorǵaný aspaptarymen qamtamasyz etilý deńgeii qandai?
Qurmetpen, T. MUQAShEV
