QR AShM Veterinariialyq, fitosanitariialyq jáne tamaq qaýipsizdigi departamentiniń direktory Gúljan Nurtazina qus etin eshbir úreisiz alýǵa bolatynyn aitty, dep habarlaidy QazAqparat.
Ortalyq kommýnikatsiialar qyzmetindegi baspasóz máslihatynda qus tumaýyna bailanysty halyq arasynda qus etin alýda qorqynysh bar ekendigi týraly suraq qoiyldy.
«Halyq arasyndaǵy osy úrei túsinikti. Atap aitqanda, jalpy ári arnaiy sharalar eskerilgen. Jalpy sharalar aiasynda aýrý paida bolǵan oshaqta tiisti sheshimder qabyldanyp, karantin engiziledi. Aýrý juqtyrǵan qustar ashanaǵa jiberilmeidi. Dezinfektsiialyq jumystarǵa erekshe mán beriledi. Al arnaiy sharalarǵa toqtalsaq, ár qus fabrikalarynda ishki óndiristik baqylaý qurylymy bolady. Ondaǵy ónim tiisti saraptamadan ótkizilip, soǵan sáikes qus ónimderi saýda oryndaryna jetkiziledi. Munymen qosa, saýda oryndarynda, bazarlarda zerthanalar ónimderdi tekseredi. Osy oraida talapqa sai keletin ónimder saýdaǵa jiberiledi», - dep túsindirdi G. Nurtazina.
Onyń aitýynsha, jumyrtqany qainatý arqyly zalalsyzdandyrýǵa bolady.
Óz kezeginde «Qazaqstan qus ósirýshiler odaǵy» ZTB prezidenti Rýslan Sháripov broiler ósiretin kásiporyndarda aýrý tirkelmegenin atap ótti. Osy oraida jumyrtqa baǵytyndaǵy eki qus fabrikasynda taýyqtarda qus tumaýy baiqaldy.
Qus tumaýyna shaldyqqan qus etiniń adamǵa qaýipsiz ekenine toqtalǵan ol, «qar túsken kezde virýs joiylady, sondai-aq qainatqan kezde (qus eti men jumyrtqany) virýs bolmaidy. Bizdiń ónim, iaǵni jumyrtqa pen et taza ekologiialyq bidaimen ósirilgen qustan alynǵan ónim. Sol úshin qainatyp, pisirip jegende ol virýs óledi. Halyqqa aitatynym, etti qoryqpai jeýge bolady. Senbeseńizder, aýyrǵan taýyqty nemese úirekti tiridei alyp kelińizder. Men ózim soiyp, qainatyp, dám tatýǵa daiynmyn», - dedi.
Budan buryn habarlanǵandai, elimizde 46 millionnan astam qus basy bar. Onyń ishinde qus tumaýynan kelgen shyǵyn 0,9 paiyzdy qurady. Osy oraida 7 oblystyń 78 eldi mekeninde karantin engizildi.
