Búgin «Nur Otan» partiiasynyń Ortalyq apparatynda «Rýhani jańǵyrý jáne jastar» atty Qazaq jastarynyń I halyqaralyq forýmy ótti.
Dúniejúzi qazaqtarynyń V quryltaiy aiasynda uiymdastyrylǵan sharaǵa «Nur Otan» partiiasy men Dúniejúzi qazaqtary qaýymdastyǵy muryndyq boldy. Oǵan «Nur Otan» partiiasy Tóraǵasynyń Birinshi orynbasary Muhtar Qul-Muhammed, Dúniejúzi qazaqtary qaýymdastyǵy Tóralqa tóraǵasynyń birinshi orynbasary Zaýytbek Turysbekov jáne álemniń 20-dan astam elinen kelgen qazaq jastary qatysty.
Forýmdy ashqan Muhtar Qul-Muhammed: «Birikken Ulttar Uiymy dúnie júzindegi 193 memlekettiń basyn qosady. Solardyń ishinde kezinde búkil álemdi otarlyq bóliske salyp, jer jahanǵa taraǵan aǵylshyn, ispan, frantsýz, portýgal, nemis jáne orys siiaqty alpaýyt halyqtar bar. Biraq osy elderdiń eshqaisysy arnaiy baǵdarlama jasap, qandastaryn shetelden aldyrtyp jatqan joq. Bizben taǵdyrlas Ortalyq Aziia elderinde de mundai úrdis kezdespeidi. Tek Qazaqstan ǵana táýelsizdik jyldary taǵdyr taýqymetimen jer betine tarydai shashyraǵan 1 millionǵa jýyq qandastarymyzdy atamekenge aldyrdy. Bul qazaqtyń baqyty úshin týǵan Elbasymyzdyń óz halqy aldynda sińirgen eren eńbegi. Osyny árbir qazaq eshqashan umytpaýy kerek», – dedi.
Túrkiiadan kelgen qandasymyz, taekvondodan osy eldiń chempiony, Mustafa Óztúriktiń laiyqty izbasary Iliias Kárim Elbasynyń «Bolashaqqa baǵdar: rýhani jańǵyrý» atty baǵdarlamalyq maqalasy búkil túrki dúniesin eleń etkizgenin aitty. Ol Memleket basshysynyń latyn álipbiine kóshý bastamasyn tolyq qoldaitynyn atap ótip, jaqynda ǵana Astana halyqaralyq áýejaiyna Elbasy esiminiń berilýin zor qýanyshpen qabyldaǵanyn jetkizdi.
Sonymen qatar forýmda Italiia, Shvetsiia, Irlandiia, Qytai, Mońǵoliia, Resei jáne taǵy basqa elderden kelgen qazaq jastary sóz aldy. Olar Elbasynyń «Bolashaqqa baǵdar: rýhani jańǵyrý» atty baǵdarlamalyq maqalasynyń mańyzy týraly aityp, EKSPO-2017 kórmesi elimizdiń mártebesin odan ári asqaqtatqanyna erekshe nazar aýdardy.
Ulttyq rýhymyzdy kóterip, eldiń eńsesin tikteý úshin osyndai is-sharalardyń mańyzy zor. Óitkeni bolashaq – jastardiki. Sondyqtan jas býyndy búginnen bastap ulttyq qundylyqtarǵa ábden qandyryp, qazaqy bolmysta tárbieleýimiz kerek. Osy turǵydan kelgende «Nur Otan» partiiasynyń bul bastamasy óte quptarlyq dúnie.
