Mańǵystaýdaǵy Quryq porty arqyly Iranmen saýda-sattyqty nyǵaitý maqsatynda alǵash ret «Quryq-Amirabad» parom jelisi iske qosyldy. Endi «Quryq-Amirabad» porttary arasynda túrli júk parom keshenimen tasymaldanady. Parom jelisi aiasynda Mańǵystaýǵa Irannan «Kompozitor Rahmaninov» kemesi keldi, dep habarlaidy "Ult aqparat".
«Kompozitor Rahmaninov» - RO-RO tiptes keme. Atalǵan kemede ártúrli qural-jabdyqpen alty eýro júk kóligi keldi. Onyń bireýinde kivi jemisi bar.
«Eń bastysy – parom arqyly kókónis pen jemis-jidek tielgen júk kólikterin tógilip-shashylýsyz (basqa kólikke aýystyryp júktemei) tutynýshyǵa jetkizýge múmkindik bar. Bir paromda 32-ge deiingi refrijeratorda (eýro júk kóligi) tez buzylatyn taýarlardy tasymaldaýǵa bolady. «Quryq-Amirabad/Enzeli» parom jelisi irandyq jáne qazaqstandyq kásipkerler úshin de qyzyqty bolatynyna senimdimin», - deidi Quryq portynyń marketing jáne logistika boiynsha atqarýshy direktor Álibek Ótegenov.
Quryq avtomobildi infraqurylymy port arqyly tranzit jáne eksporttyq-importtyq baǵyttaǵy júkti qabyldaý men jyldam qyzmet kórsetýge tolyǵymen daiyn.
Buǵan deiin Quryq porty Ázirbaijanmen ǵana parom jelisin iske qosqan bolatyn.
2020 jyldyń 10 aiynda Quryq porty arqyly ótetin júk 1.352 mln tonnany qurady. Kórsetkish ótken jylmen salystyrǵanda 290 myń tonnaǵa nemese 21% joǵary.
Eksportqa munai, astyq jáne halyqtyq qoldanystaǵy taýarlar jiberledi. Al import – zattyq ónimder men qurylys materialdary sekildi halyqtyq qoldanystaǵy taýarlar.
Quryq porty Aqtaý qalasynyń ońtústiginde 100 shaqyrym qashyqtyqta ornalasqan. Porttyń qurylysy 2015 jyldyń sáýir aiynda bastalǵan. Porttyń temir jol paromdy terminaly 2016 jyldyń 6 jeltoqsanynda paidalanýǵa berildi.
Quryq porty baǵdarlamasynyń jyldyq qýaty - 6 mln tonna.
