Parlament Senatynyń jalpy otyrysynda depýtattar QR Úkimet basshysyna jáne Respýblikalyq biýdjettiń atqarylýyn baqylaý jónindegi Esep komitetiniń tóraiymyna depýtattyq saýal joldady, dep habarlaidy "Ult aqparat".
Senator Aqylbek Kúrishbaev zańda áleýmettik mańyzy bar azyq-túlik taýarlarynyń baǵasyn turaqtandyrýdyń naqty mehanizmi belgilengenin jáne bul maqsatqa biýdjetten 30 mlrd teńgege jýyq qarjy bólingenin aitty. Azyq-túlik taýarlarynyń baǵasyn turaqtandyrýǵa qatysty kóptegen suraqtar týyndaidy.
«Birinshiden, saýda ortalyqtaryn tańdaý printsipi túsiniksiz. Nege keibir tańdaýlylar ǵana jeńildetilgen nesiege ie bolady? Ekinshiden, azyq-túlik taýarlary baǵasynyń eleýli qubylýy kezinde onyń eń tómengi shegin aldyn ala boljaý óte qiyn. Óitkeni, aýylsharýashylyq ónimderiniń baǵasy tek maýsym boiynsha ǵana emes, árbir jylda ózgerip otyrady», - dedi Senat depýtaty.
Aqylbek Kúrishbaev bul shemada saýda ortalyqtary tek otandyq aýylsharýashylyq taýarlaryn alýǵa mindettelmegenin, sol sebepti qazaqstandyq fermerler óz ónimderin ótkize almai biýdjet qarajaty sheteldik óndirýshilerdi qarjylandyrýǵa jumsalyp jatqanyn aitty.
«Turaqtandyrý qorynyń baǵany retteýge, biýdjet qarajatyn tiimdi paidalanýǵa degen pármendiligi de kúmán keltiredi, sebebi onda sybailas jemqorlyq kórinisteri basym. Meniń oiymsha, bul máselemen Sybailas jemqorlyqqa qarsy is-qimyl agenttigi shyndap ainalysýy kerek», - dedi senator.
Sonymen qatar, senator baǵany retteý jónindegi memlekettik sharalar barlyq turǵyndarǵa paidaly bolýy úshin, osy qorǵa satyp alynatyn azyq-túlik taýarlarynyń kólemin ulǵaitý mańyzdy ekenin aitty.
«Eger atalǵan maqsattarǵa biýdjet qarajatyn kóbeitý múmkindigi bolmasa, tikelei az qamtylǵan otbasylar sanatyn qoldaýǵa kóshken durys. Ol úshin halyqtyń az qamtylǵan toptaryna arnap, áleýmettik azyq-túlik taýarlarynan qor qalyptastyrý qajet. Azyq-túlik taýarlaryn satyp alýdy jáne olardy saqtaý, tasymaldaý, ótkizý jónindegi qyzmetterdi fiýcherstik kelisim-shartpen konkýrstyq negizde tek otandyq taýar óndirýshilermen jasaý qajet. Bul maqsattarǵa uzaq jáne jeńildetilgen biýdjettik nesielerdi qarastyrý tiimdi», - dedi Aqylbek Kúrishbaev.
