Elimizde aýyl sharýashylyǵy maqsatyndaǵy jerler jekemenshikte emes, tek memlekettiń quzyrynda bolýy kerek. Bul týraly Jer reformasy jónindegi komissiianyń 1-otyrysynda Senat depýtaty Aqylbek Kúrishbaev aitty, dep habarlaidy QazAqparat.
«Qazaqstan úshin aýylsharýashylyǵy maqsatyndaǵy jer jai ǵana óndiris quraly emes, eń aldymen bul - bizdiń ulttyq igiligimiz, ata-babamyzdan qalǵan tarihi muramyz, búkil halqymyzdyń bailyǵy jáne onyń basty qundylyǵy. Meniń jeke pikirim, Qazaqstandaǵy aýyl sharýashylyǵy maqsatyndaǵy jerler jekemenshikte emes, tek memlekettiń quzyrynda bolýy kerek. Eń aldymen bul bizdiń geosaiasi jaǵdaimyzǵa bailanysty. Aýyl sharýashylyǵy jerleriniń kólemi boiynsha biz álemde 6-orynda turmyz. Al egistik alqaptary boiynsha jan basyna shaqqanda Avstraliiadan keiin ekinshi oryndamyz. Iaǵni, bir adamǵa shamamen 1,3 gektar egistik jer keledi. Basqasha aitqanda, bizde halyq tyǵyzdyǵy óte tómen. Sondyqtan memlekettiń ulttyq qaýipsizdigin qamtamasyz etý úshin jer resýrstarymyzdyń jekemenshikte emes tek qana memlekettik menshikte bolǵany mańyzdy. Jer tek jalǵa berilýi tiis», - dedi komissiianyń birinshi otyrysynda senator.
Onyń atap ótýinshe, álemdik tájiribede mundai mysaldar bar. Máselen, naryqtyq ekonomikasy damyǵan Izrailde barlyq aýyl sharýashylyǵy jerleri memlekettiń quzyrynda.
