Kýrer-ana barlyq kómekten bas tartty. Bul týraly jelide Almat Nesipqaliev esimdi azamat jazdy, dep habarlaidy ult.kz.
"Osy atalǵan taqyrypty tolyq jaýyp, barlyǵyn Allaǵa tapsyrdym. Degenmen, sońyna deiin kómek kórsete almaǵanyma qatty ókinish bar. Birneshe kún boiy tynym tappai, bar ýaqytymdy, nazarymdy, shynaiy nietimdi osy iske arnadym. Jumysymdy da ysyryp qoiyp, halyq bolyp, ult bolyp birigip kómek qolyn sozsaq degen oimen áreket ettim. Ol kisini alǵash kórgen sátten bastap oiymda tek kómektesý boldy. Birneshe kún durys uiyqtai almadym. Oiym men fokýsym sol jaqta júrdi. Jumystan kesh shyqsam da, jaǵdailaryn bilý úshin joldasymmen birge bardym. Qolymyzdan kelgenshe shaǵyn kómek kórsettik, mán-jaiyn bildik. Tek bilip qana qoimai, naqty kómek kórsetemiz dep shyn nietimizdi bildirdik.
Kelesi kúni video material túsirip, kómek jinaýǵa (sbor) kómektesetinimizdi aittyq. Ol kisi kelisimin berdi, kerek-jaraqtaryn jazyp aldyq, kómek berýimdi ótindi. Men óz nómirim arqyly nemese óz atymnan eshqashan aqsha jinaǵan emespin
Nietim - rekvizitterin alyp, kómekti tikelei sol adamdardyń ózine jetkizý edi. Birneshe qaiyrymdylyq qorlaryna jazdym, sóilestim, tipti úi alyp berýge deiin tyrystym. Basty maqsat - qai jaǵynan bolsyn bir paidamdy tigizý boldy.
Osy jaǵdaiǵa bailanysty jumys ornymnan da shyǵyp kettim. Negizgi oiym - ana men 4 ailyq Nýrilaǵa kómektesý edi…
Sonymen qatar, osy arqyly qoǵamdaǵy kóptegen jas analardyń, jalǵyzbasty batyr analarymyzdyń jaǵdaiyn kórsetip, qoldaý bildirý bolatyn. Tek bir otbasynyń emes, jalpy Qazaq eliniń jaǵdaiyna tittei bolsa da úles qossam degen oi boldy. Maǵan bul isten eshqandai qarjy túsken joq, eshkim kelip meniń jaǵdaiymdy jasap bergen joq. Meniń bar jasaǵanym - júrekpen janashyrlyq tanyt, 4 ailyq sábidiń esh kinási joq qoi degen oi maza bermedi. Tún uiqym buzylyp, qalai kómek kórsete alamyn degen suraq oiymnan ketpedi. Biraq barlyǵy men oilaǵandai bolmady. Kelinshegimekeýmiz video túsirýge bardyq. Eshqandai mobilograf ta, videograf ta bolǵan joq
Qolymyzda arnaiy jaryq ta bolmady. Bar bolǵany - shynaiylyq. Úidiń syrtynan bastap, ishke tek ózderiniń ruqsatymen kirip túsirdik. Barlyǵy shynaiy boldy. Mán-jaidy ashyq aityp berýin, tek naqty ári shyn aqparat aitýyn suradym. Qaryzdary, kreditteri, diagnozǵa qatysty qujattary men vypiskalaryn túgel tekserip aldym.
Video túsirilip boldy, montajdalyp, tek salý ǵana qalǵan edi. Alaida búgin maǵan habarlama keldi. Meniń nietim - videony áleýmettik jelilerge jariialap, halyq bolyp kómek jinaýdy bastaý edi…
Biraq ol kisiler ózderi kómekten bas tartty. Qońyraýlaryma jaýap bermedi. «Kerek emes, videony salmańyz» dep jaýap qaitardy. Memleket tarapynan kómek kórsetilip jatqanyn, ýaqytsha turǵyn úi máselesi sheshilgenin, endi jumysqa ornalastyratynyn aitty. Videony salsań, ústińnen aryz jazamyn dep, meni buǵattap tastady.
Osy sátte kóńilim qatty túsip qaldy. Endi halyq bolyp birigip, úi alyp berip, jaǵdaiyn retteimiz degende osyndai jaǵdai oryn aldy. Haiyrlysy osy shyǵar…
Men qolymnan kelgenniń bárin jasaýǵa tyrystym. Habarǵa shyqtym, úilerine de bardym, biraq eshqandai jaýap bolmady.
Bul oqiǵa meni beijai qaldyrmaidy. Óitkeni dál osyndai qiyn jaǵdaida júrgen qanshama jas otbasylar, jalǵyzbasty analar, múmkindigi shekteýli jandar bar. Kóptegen myqty analarymyz osyndai aýyr jaǵdaida jumys isteýge májbúr bolyp júr. Barlyq halyqtyń aldynda bastalǵan is bolǵandyqtan, osy jazbany jazýǵa sheshim qabyldadym, halyq meni joq bolyp ketti dep oilamasyn, men sońyna deiin barǵym keldi.
Úlken ózgersiter ákelý úshin úlken is kerek emes. Kishkentai qadamnan bastap, halyq bolyp birigip, úlken nátijege jetýge bolady.
Bul- meniń jeke oiym. Endi qalǵanynyń Allaǵa tapsyrdym, nietime Allam ózi kýá!», - dep jazdy ol.
