Qazaqstan Respýblikasynyń Tuńǵysh Prezidenti – Elbasy Nursultan Nazarbaev qazaqstanyqtardy Qurban ait merekesimen quttyqtady. Bul týraly "Ult aqparat" elbasy.kz saityna silteme jasap habarlaidy.
***
Qurmetti otandastar!
Barshańyzdy qasietti Qurban ait merekesimen quttyqtaimyn!
Meiirimdiliktiń, jaqsylyq pen jasampazdyqtyń simvoly bolyp sanalatyn bul jarqyn meiram bizdiń júregimizge jaqyndarymyzǵa degen súiispenshilik uialatyp, igi isterge, muqtaj jandarǵa kómektesýge úndeidi.
Osy kúni biz Jaratqanǵa jalbarynyp, ózimizge beibit ómir men tynyshtyq, qairat-qýat pen rýhani kúsh-jiger suraimyz.
Qurban ait bizdi izgi úrdisterge baýlyp, adami qundylyqtardyń baǵasyn arttyra túsedi.
Elimizde Qurban ait ártúrli ulttar men din ókilderi arasyndaǵy birlikti nyǵaitýǵa septigin tigizedi.
Osy qasterli merekede barsha qazaqstandyqtarǵa zor densaýlyq pen baq-bereke tileimin!
Ait qabyl bolsyn!
