Foto: QazUTOB teatry baspasóz qyzmeti
Abai atyndaǵy Qazaq ulttyq opera jáne balet teatrynda Ahmet Jubanov pen Latif Hamididiń ańyzǵa ainalǵan «Abai» operasynyń jańartylǵan nusqasynyń premerasy ótti, dep habarlaidy Ult.kz.
Seksen jyldan astam ýaqyt boiy bul shyǵarma ulttyq opera óneriniń jaýhary ári teatrdyń airyqsha bet-beinesi sanalyp keledi.
Premera qarsańynda ótken baspasóz konferentsiiasynda qoiylym toby jańartylǵan spektakldiń tujyrymdamasyn, kórkemdik jáne mýzykalyq sheshimderin, sondai-aq klassikalyq túpnusqamen sabaqtastyqty saqtaý qaǵidattaryn keńinen tanystyrdy. Qoiylymnyń rýhani ózegi sanalatyn urpaqtar sabaqtastyǵy, dástúr men zamanaýi oidyń toǵysýy máselesine erekshe mán berildi.
Foto: QazUTOB teatry baspasóz qyzmeti
Jańa sahnalyq nusqanyń basty ereksheligi – klassikalyq shyǵarmany búgingi zamannyń kózqarasy arqyly paiymdai otyryp, onyń filosofiialyq tereńdigin saqtap qalýy. Rejisserlik tujyrymdama Abaidyń ishki jan dúniesin, adamgershilik tańdaýy men óz dáýirimen rýhani qaishylyǵyn tereńirek ashýǵa baǵyttalǵan.
Qoiylymnyń stsenografiiasy men vizýaldyq sheshimderinde eleýli jańashyldyqtar engizildi. Qoiylym sýretshisi Esengeldi Tuiaqov sahnalyq keńistikti ýaqyttyń, jadynyń jáne halyq taǵdyrynyń simvoly sanalatyn dalanyń jinaqtalǵan beinesi retinde usyndy. Minimalistik dekoratsiialar tereń maǵynalyq aktsenttermen tolyqtyrylyp, kórermen nazaryn keiipkerler men dramatýrgiiaǵa shoǵyrlandyrdy.
Baspasóz konferentsiiasynda kostiýmdik sheshimder de tanystyryldy. Raýan Qairýllaeva jasaǵan sahnalyq obrazdar tarihi formalar men ulttyq naqyshtardy saqtai otyryp, zamanaýi kórkemdik turǵyda qaita paiymdalǵan.
Foto: QazUTOB teatry baspasóz qyzmeti
Mýzykalyq partitýra ózgerissiz qaldyryldy. Qoiylym toby shyǵarmanyń túpnusqalyq mýzykalyq qurylymyn saqtap, basty nazardy jańa sahnalyq oqylymǵa, temporitm men dramatýrgiialyq ekpinderge aýdarǵan. Bas dirijer Nurjan Baibosynovtyń basqarýymen orkestr, hor jáne solister partitýranyń aýqymy men mazmunyn tutas ári úilesimdi túrde jetkizdi.
Qoiylym rejisseri Farhat Moldaǵali atap ótkendei, jańa redaktsiiada urpaqtar sabaqtastyǵy taqyryby airyqsha mánge ie. Alǵashqy klassikalyq qoiylym men zamanaýi oqylym arasyndaǵy rýhani bailanys mýzykalyq mátinge, keiipkerler beinesine jáne shyǵarmanyń filosofiialyq ózegine degen qurmet arqyly saqtalǵan.
Premera tolyq anshlagpen ótip, kórermender tarapynan zor qoshemetke ie boldy. Qoiylym sońynda ártister men shyǵarmashylyq top uzaq qol shapalaqtaýǵa bólenip, kórermender jańa qoiylymǵa teatr repertýarynda uzaq ǵumyr tiledi.
