QR Densaýlyq saqtaý ministrligi Qoǵamdyq densaýlyq saqtaý komiteti Qyrǵyzstan Respýblikasynyń konditerlik ónim óndirýshilerdiń ónimderin Qazaqstanǵa ákelýine jáne satýyna qoiylǵan ýaqytsha shekteýdi alyp tastady, dep habarlaidy "Ult aqparat" vedomstvonyń baspasóz qyzmetine silteme jasap.
«Konditerlik ónimderdi ákelýge jáne ótkizýge tyiym salý boiynsha ýaqytsha sanitariialyq sharalardy engizý týraly» Qazaqstan Respýblikasynyń Bas memlekettik sanitariialyq dárigeriniń qaýlysyn joiý úshin Qyrǵyz Respýblikasy Densaýlyq saqtaý ministrliginiń «Kýlikovskii» konditerlik úii» kásipornyna qatysty qajetti sharalardy qabyldaý jáne sanitariialyq-epidemiiaǵa qarsy is-sharalardy júrgizý týraly habarlamasy, sondai-aq Keden odaǵynyń tehnikalyq reglamentteri talaptaryna sáikes keletin konditerlik ónimderge júrgizilgen zerthanalyq zertteýler nátijeleri negiz boldy», - delingen komitettiń habarlamasynda.
Atalyp ótilgendei, sáikes kelmeitin ónimderdiń qaýpin azaitý maqsatynda komitet joǵaryda atalǵan kásiporynnyń ónimderin engizý barysynda qaýipsizdikti qadaǵalaýdy jalǵastyrady. Bul shara Eýraziialyq ekonomikalyq komissiia keńesiniń tiisti sheshimimen retteletin zerthanalyq baqylaýdy kúsheitý sheńberinde júzege asyrylady.
«Baqylaýdyń osy túri ýaqytsha sanitariialyq sharalarǵa balama bolyp tabylady jáne konditerlik ónimderdi Qazaqstannyń tutyný naryǵyna ákelýge jáne ótkizýge bolatyndyǵyn bildiredi», - delingen mátinde.
