"Búgin Almatydaǵy tergeý abaqtysynda Rýslan Kúlekbaevtyń isine qatysty basty sot otyrysy ótip jatyr. Sot barysynda memlekettik aiyptaý tarapy Kúlekbaevtyń Sodnikovany óltirýine qatysty aiyptaý qorytyndysyn oqydy", - dep habarlaidy Ult.kz tilshisi QazAqparat agenttigine silteme jasap.
«Kúlekbaev 2016 jyldyń 17-18 shildesinde Jansúgirov kóshesindegi "Aiat" qonaqúiinde jezóksheler júrýi múmkin ekenin aldyn ala josparlap, óziniń dini áleýmettik kózqarasyna qaishy bolǵandyqtan, jezókshelikpen ainalysatyn áielderdi óltirý maqsatynda atalǵan orynǵa barǵan. Qonaq úi aýlasynda turǵan Imanǵalievke tiesili Kia Rio avtokóligine baryp, onyń ishinde jezóksheler bar ekenin boljap, ishinde otyrǵan Imanǵalievten terezesin ashýdy suraǵan. Kólik terezesi ashylǵannan keiin, birneshe eskertý jasap, oǵan kónbegen soń artqy oryndyqta otyrǵan Sodnikovany basynan atyp óltirgen. Osy kezde Imanǵaliev qashyp shyqqan. Kúlekbaev onyń artynan oq atqanymen, tigize almaǵan. Ýaqytyn tiimdi paidalaný maqsatynda kólikke kelip, ishinde otyrǵan ekinshi Ómirzaqovany alyp, Sodnikovanyń máitin alyp, qalada júrgen. Jolda Ómirzaqovaǵa «Sender Allahtan qoryqpaisyńdar! Allahtan keshirim sura?! Allahtyń jolyna qarsy shyqsańdar, bárińdi jaryp jiberemin» dep qorqytqan. Ómirzaqova ómirine qaýip tóngendikten keshirim surap, óz ámianyn Kúlekbaevqa bergen. Kúlekbaev ishinde 7 myń teńgesi bar Ómirzaqovanyń ámiianymen qosa, kólik ishinde turǵan Imanǵalievtiń ishinde 42 000 teńgesi bar ámiianyn alǵan. Jolda kóliktiń qyzyl baǵdarshamǵa toqtaǵanyn paidalanyp, Ómirzaqova odan qashyp shyǵyp qutylǵan. Kúlekbaev ony qýmaǵan. Osydan keiin Kúlekbaev qaladaǵy bir dúken aldyna kelip kólikti qaldyryp ketken», dedi prokýror Jarqyn Baqashbaev.
Qylmystyq ister jónindegi mamandandyrylǵan aýdanaralyq soty sýdiasy Erlan Bolatovtyń aiyptalýshylarǵa ornynan turyp, jaýap berý qajet degen talabyna aiyptalýshy Rýslan Kúlekbaev baǵynbady, dep habarlaidy sot zalynan QazAqparat tilshisi.
«Kúlekbaev ornyńyzdan turyńyz!» degen sýdia Erlan Bolatovtyń talabyna Kúlekbaev baǵynbady. Birneshe ret aityp ornynan turǵyza almaǵan sýdia aqyry sebebin suraýǵa májbúr boldy.
Kúlekbaev ishin kórsetip: «tursam, aýyrady!» dep jaýap berdi.
Buǵan sýdia kelisti.
Aita keteiik, Almaty qalasynyń Qylmystyq ister jónindegi mamandandyrylǵan aýdanaralyq sotyna R.Kúlekbaevqa qatysty qylmystyq isti atalǵan sot sýdiasy Erlan Bolatov júrgizip jatyr. Kúlekbaev birneshe qanquily tonaý jáne qaraqshylyq áreketterge qatysty bolyp otyr. Buǵan deiin habarlanǵandai, tergeý toby 57 sot saraptamasy men zertteýler júrgizdi jáne bolǵan oqiǵanyń barlyq jáitterin anyqtaý maqsatynda 200-den astam kýágerler men oqiǵany kórgen adamdardy tergedi. 2016 jyldyń 12 qazanynda 61 tomnan turatyn qylmystyq is sotqa joldandy. R.Kúlekbaevqa 8 quqyq qorǵaý jáne arnaiy organ qyzmetkerlerin jáne 2 beibit turǵyndy óltirdi, terrorlyq akt jasady degen aiyp taǵyldy. Sonymen qatar, ol 3 beiibit turǵyndy óltirmek boldy dep aiyptalyp otyr.
Naqtyraq aitqanda, aiyptalýshyǵa qatysty QR Qylmystyq kodeksiniń (QR QK) 255-baby 4-tarmaǵy (lańkestik akt), 99-baby 2-tarmaǵy (eki nemese odan da kóp adamdy óltirý), 24-babynyń 3-tarmaǵy (óltirý úshin shabýyl jasaý), 192-bap 4-tarmaq (top adamǵa qaraqshylyq shabýyl), 287-bap 4-tarmaq (zańsyz qarý tasymaldaý), 288-bap 2-tarmaq (qarýdy zańsyz jasaý), 291-bap 4-tarmaq (qarý urlaý), 200-bap 4-tarmaq (kólik urlaý), 126-bap 2-tarmaq (adamdy zańsyz bas bostandyǵynan aiyrý) boiynsha qylmystyq is qozǵalǵan.
Sondai-aq, R.Kúlekbaevpen birge sotqa atys qarýyn zańsyz saqtap, ózimen birge alyp júrip, daiyndap, R.Kúlekbaevpen birge M. atty kásipkerdiń úiine qaraqshylyq shabýyl uiymdastyrǵan R.Liý, J.Saparbekov, D.Ásembekuly, E.Qusaiynov, N.Ábdimomyn da sot zalynda.
Aiyptalýshy N.Ábdimomynǵa ruqsatsyz qaladan ketýine tyiym salynǵan. R.Liýǵa qatysty QR QK 188-babynyń 4-tarmaǵy, 288-babynyń 1-tarmaǵy, 287-babynyń 4-tarmaǵyna qatysty qylmystyq is qozǵaldy. J. Saparbekovtiń ústinen QR QK 192-baby 4-tarmaǵy; 287-bap 4-tarmaq boiynsha qylmystyq is qozǵaldy. E. Qusaiynovqa qatysty QR QK 192-babynyń 4-tarmaǵy boiynsha, D. Ásembekulyna qatysty QR QK 192-babynyń 4-tarmaǵy, N. Ábdimomynǵa qatysty QR QK 287-babynyń 4-tarmaǵy boiynsha qylmystyq is qozǵaldy.
