Aqtóbe oblysyna issaparmen kelgen Úkimettiń jumys toby turǵyndarmen kezdesti. Kezdesý barysynda QR Bilim jáne ǵylym ministri Kúlásh Shámshidinova «Álippe ornyna qaityp keledi» dep jinalǵandardy qýantty.
QR Bilim jáne ǵylym ministri aýysqan saiyn elimizde bilim baǵdarlamasynyń da aýysatyny úirenshikti jaǵdaiǵa ainaldy. Degenmen, bul kúni keshegi «Álippeni» ańsaityndar kóp. Aqtóbelikterdi óńirge jumys saparymen kelgen jańa QR Bilim jáne ǵylym ministri Kúlásh Shámshidinova qýantty. Álippe qaita oralady.
«Álippege bailanysty aitaiyn, biylǵy oqý jylynda álippeni qaitaryp úlgermeimiz. Al, kelesi oqý jylynda álippe ornyna qaityp keledi. Balalarǵa bilimdi ózderi izdeýge úiretýimiz qajet», - dedi Kúlásh Shámshidinova.
Elde balaǵa bilim beretin pedagogtardy qaita daiarlaý qolǵa alyndy. 144 myńnan kóp muǵalim kýrstardan ótedi. Mektep psihologtary, synyp jetekshileri de qaita daiarlanady.
«Jalpy mekteptegi bilimniń sapasy muǵalimniń sapasyna bailanysty. Aldaǵy úsh jylda jańartylǵan bilim baǵdarlamalaryna sai jańa metodikalyq, tehnologiialyq ádistemelerge úiretý úshin 144 myńnan artyq muǵalim qaita daiyndaý kýrstarynan ótedi. 82 myń mektep psihology men synyp jetekshileri de kýrstardan ótedi. 15 myńnan artyq kolledj qyzmetkerleri men pedagogikalyq ýniversitetterde jumys isteitin pedagogtar orta bilimniń jańarýyna bailanysty qaita oqytylady. Kóp eldi tolǵandyryp, qaita-qaita aitylyp júrgen másele – joǵarǵy synyptarda himiia, fizika, biologiia, informatika pánderin aǵylshyn tilinde berý. Mektepte sabaq beretin kadr, mektep daiyn bolǵan kezde ózderińizben kelise otyryp, kezeń-kezeńimen kóshetin bolamyz», - dedi ministr.
Kúlásh Shámshidinova elde mektepter salý týraly suranystar jer-jerden kóp túsetinin de atap ótti. 2019-2021 jyldar aralyǵynda Qazaqstanda 190 mektep salynady. Olar apattyq jaǵdaidaǵy úsh aýsymdaǵy bilim mekemeleriniń ornyn aýystyrady.
«Táýelsizdik jyldary Qazaqstanda 1 672 mektep salynǵan. Apattyq ǵimaratta ornalasqan, úsh aýysymda jasaityn, oqýshylardyń oryny jetpeitin mektepterdiń problemasyn sheshetin bolady. Tek Aqtóbe oblysy boiynsha aldaǵy úsh jylda 9 mektep salynady. Biz jalpy mektep muǵalimderin qoldaýymyz qajet. Balalarymyzǵa patriottyq tárbie berý úshin Qazaqstan tarihy, qazaq tili, geografiia pánderiniń mazmundary óz elimizdiń mentalitetine sai júrgiziledi. Mektepte bilim berýge er azamattarty shaqyrý kerek. Sebebi, balabaqsha men mektepte áielderdiń tárbiesin alǵan balalar qyz sekildi bolyp barady», - dedi QR Bilim jáne ǵylym ministri Kúlásh Shámshidinova.
