QR Premer-Ministri A. Maminniń tóraǵalyǵymen ótken Úkimet otyrysynda Elbasynyń stýdent jastardyń turý jaǵdaiyn jaqsartý jónindegi tapsyrmalaryn oryndaý barysy qaraldy, dep habarlaidy "Ult aqparat" primeminister.kz saityna silteme jasap.
QR bilim jáne ǵylym ministri K. Shámshidinova Elbasynyń 75 myń oryndyq jataqhana salý týraly Úshinshi bastamasyn oryndaý maqsatynda josparly jumystar júrgizilip jatqanyn aitty.
Ótken jyldyń ózinde oqý oryndary men jergilikti biýdjet esebinen 3 myńnan astam oryn engizildi. Osy jobaǵa investorlardy keńinen tartý maqsatynda «Atameken» ulttyq kásipkerler palatasymen birge memlekettik-jekemenshik áriptestik qaǵidalaryna negizdelgen arnaiy tetik júzege asyrylýda, qajetti normativtik-quqyqtyq baza qalyptastyrylyp, qarjy kólemi bekitildi. Jataqhanalar qurylysymen ainalysatyn kásipkerlerge injenerlik kommýnikatsiialary daiyn jer telimderi berilip jatyr.
«Memleket banktik nesieniń 7%-yn sýbsidiialaidy, jataqhanalar qurylysyna qoiylatyn talaptar jeńildetildi. Bul sharalar investorlar shyǵyndaryn qysqartyp, jobalardyń jalpy qunyn tómendetýge múmkindik beredi», — dep QR bilim jáne ǵylym ministri, jataqhana qoldanysqa berilgennen keiin 8 jyl qatarynan memlekettik tapsyrys ornalastyrylatynyn aitty.
Nur-Sultan qalasynda jataqhana aqysyn ákimdik tarapynan sýbsidiialaý tetigi engizilgen. Búgingi tańda 19 myńnan astam orynnyń engizilýin qamtamasyz etetin 43 joba iske asyrylyp jatyr. Olardyń 20-sy kásipkerlerdiń, 24-i oqý oryndarynyń, onyń ishinde 13-i jeke menshik oqý oryndarynyń bastamasymen júzege asady.
«Atalǵan jobalar aiasynda osy jyldyń ózinde josparlanǵan 5 myńnyń ornyna 9 196 oryn engiziledi. Iaǵni, jospar 184%-ǵa oryndalady», — dedi K. Shámshidinova. Óńirlerdiń arasynda aldyńǵy qatarda — Nur-Sultan, Shymkent qalalary men Jambyl oblysy.
Onyń aitýynsha, memlekettik joǵarǵy bilim ordalarymen salystyrǵanda, jekemenshik oqý oryndarynyń belsendiligi anaǵurlym joǵary. Mysaly, biyl jekemenshik oqý oryndary 8 jataqhanany engizetin bolsa, memlekettik oqý ornydary nebári 2 jataqhanany engizbek.
«Óńirlerde jataqhanalar qurylysyn keńinen taratý maqsatynda investorlarmen kezdesýler ótkiziledi, jobanyń arnaiy saity iske qosyldy. Biylǵy mamyr–qyrkúiek ailarynda investorlardy keńinen tartý úshin úzdik jobalar aktsiiasy ótkiziletin bolady.
Aǵymdaǵy jyldyń kórsetkishine qol jetkizý úshin birqatar jumys atqaryldy. Degenmen kelesi jyldyń josparynyń oryndalýy alańdatyp otyr. Osyǵan orai kelesi sharalardy júzege asyrýǵa qoldaý kórsetýdi suraimyz. Birinshi - óńirlerde barlyq oqý oryndary kórsetilgen jataqhana salýdyń tolyq kestesin bekitý. Ekinshi - qymbat turatyn jobalyq-smetalyq qujattardy ázirleýdi toqtatý. Úshinshi - jer máselesin ońtaily sheshý maqsatynda memlekettik joǵary oqý oryndaryn kommertsiialyq emes aktsionerlik qoǵam etip qaita uiymdastyrý jumysyn jedeldetý. Tórtinshiden, osy jobany iske asyrý barysynda seismikaǵa qatysty máseleler kóterildi. Osyǵan bailanysty normativke seismikany eskeretin koefitsientti qarastyrý», - dedi ministr», — dedi bilim jáne ǵylym ministri.
Óńirlerde atqarylyp jatqan jumystar týraly Jambyl oblysynyń ákimi A. Myrzahmetov pen Shymkent qalasynyń ákimi Ǵ. Ábdirahymov baiandady.
Óz kezeginde, QR Premer-Ministriniń orynbasary G. Ábdiqalyqova jataqhanalardy ýaqytyly engizý jáne stýdentter úshin qolaily turý jaǵdaiyn qamtamasyz etý uzaqmerzimdi mindet ekenin atap ótti.
