Ózbekstannyń Sýrhandariia oblysynda kelinshekti bes ailyq sábiimen birge birneshe ai boiy mal qorasynda zańsyz ustap, azaptaǵan otbasy múshelerine sot úkimi shyqty, dep habarlaidy ult.kz.
Oqiǵa 2025 jyldyń tamyz aiynda Uzyn aýdanynda bolǵan. Tergeý málimetinshe, er adam júkti áieldi úiine birge turý úshin alyp kelgen. Ol kezde kelinshek júktiliktiń altynshy aiynda bolǵan. Alaida er adam oǵan resmi túrde úilenbei, týystarymen birge áieldi mal qorasyna qamap, bostandyǵynan aiyrǵan.
Is materialdaryna sáikes, jábirlenýshiniń sóileý qabiletinde aqaý bolǵandyqtan, ol eshkimnen kómek surai almaǵan. Qoranyń esigi syrtynan symmen bailanyp, áiel keide qol-aiaǵy bailaýly kúide ustalǵan. Oǵan únemi kúsh kórsetilip, durys tamaq berilmegendikten, qarbyz qabyǵy men mal azyǵyn jep jan saqtaýǵa májbúr bolǵan.
Áiel dál sol qorada meditsinalyq kómeksiz bosanyp, sábiin dúniege ákelgen. Alaida arada eki kún ótkende náresteni anasynan tartyp alyp, kelinshekti qaitadan qoraǵa qamap qoiǵan. Keiin kórshilerdiń kúdigi negizinde quqyq qorǵaý organdary aralasyp, áiel qutqarylǵan.
Bul is boiynsha kúieýi, onyń anasy jáne taǵy eki týysy sot aldynda jaýap berdi. Sot sheshimimen negizgi aiyptalýshy 13 jylǵa bas bostandyǵynan aiyryldy. Taǵy eki áiel 9 jyldan bas bostandyǵynan aiyrylsa, enesi 5 jylǵa bas bostandyǵyn shekteý jazasyna kesildi. Olar zańsyz bas bostandyǵynan aiyrý, otbasylyq zorlyq-zombylyq, adam saýdasyna oqtalý jáne ózge de aýyr qylmystar boiynsha kináli dep tanyldy.
