Ózbekstanda kelinshekti sábiimen birge qorada ustaǵan kúieýi men týystary sottaldy, dep habarlaidy ult.kz.
Ózbekstannyń Sýrhandariia oblysynda kelinshekti bes ailyq sábiimen birge birneshe ai boiy mal qorasynda zańsyz ustap, qorlaǵan otbasy múshelerine sot úkimi shyqty.
Tergeý málimetinshe, oqiǵa 2025 jyldyń tamyzynda Uzyn aýdanynda bolǵan. Er adam birge turatyn áielin úiine alyp kelgen kezde ol júktiliktiń altynshy aiynda bolǵan. Alaida oǵan úilenýdiń ornyna, kúieýi men týystary áieldi bostandyǵynan aiyryp, mal qorasyna qamap qoiǵan.
Sot materialdaryna sáikes, jábirlenýshi sóileý qabiletinde aqaýy bolǵandyqtan, ózgelerden kómek surai almaǵan. Qoranyń esigi symmen bailanǵan, áiel jii bailaýly kúide ustalyp, júieli túrde soqqyǵa jyǵylǵan ári tamaqtan qaǵylǵan. Amalsyz ol qarbyz qabyǵy men mal azyǵyn jep kúneltken.
Áiel dál sol qorada eshqandai meditsinalyq kómeksiz bosanyp, sábiin dúniege ákelgen. Eki kúnnen keiin náresteni anasynan tartyp alyp, áieldi qaitadan qoraǵa qamap qoiǵan. Keiin kórshilerdiń kúdigi negizinde jaǵdai áshkerelenip, jábirlenýshi qutqarylǵan.
Is boiynsha kúieýi, onyń anasy jáne taǵy eki týysy sot aldynda jaýap berdi. Sot negizgi aiyptalýshyny 13 jylǵa bas bostandyǵynan aiyrdy. Taǵy eki áiel 9 jylǵa sottalsa, enesine 5 jyl merzimge bas bostandyǵyn shekteý jazasy taǵaiyndaldy. Olar zańsyz bas bostandyǵynan aiyrý, otbasylyq zorlyq-zombylyq, adam saýdasyna oqtalý jáne ózge de aýyr baptar boiynsha kináli dep tanyldy.
