Almatyda fitnes-jattyqtyrýshy Damir Tórebaevtyń ólimine qatysty sot protsesi aiaqtaldy, dep habarlaidy "Ult aqparat" Stan.kz aqparat agenttigine silteme jasap.
Baqytjan Aqyshev qajetti ózin-ózi qorǵaý sharalaryn asyra oryndaǵany úshin kináli dep tanylyp, oǵan eki jylǵa bas bostandyǵynan aiyrý jazasyn qatań rejimdegi koloniiada óteý jazasy taǵaiyndaldy. Qylmys týraly habarlamady dep aiyptalǵan Dáýren Ysqaqov sot zalynda bosatyldy.
Jaryssózde prokýror Aqyshevty Qazaqstan Respýblikasy Qylmystyq kodeksiniń 99-babynyń 1-bóligi "Adam óltirý" boiynsha kináli dep tanyp, 13 jylǵa bas bostandyǵynan aiyryp, jazasyn qatań rejimdegi mekemede óteýdi surady. Alaida sot istiń barlyq mán-jaiyn eskere otyryp, onyń qorǵaýshysy talap etkendei, isti Qazaqstan Respýblikasy Qylmystyq kodeksiniń 102-baby "Qorǵanys maqsatynda adam óltirý" boiynsha qarady.
"Kýágerlerdiń, sottalýshylardyń bergen jaýaptary, sondai-aq balta men esikti qaraý nátijesinde marqumnyń qaýipti zatpen qarýlanyp, buzaqylyq áreketter jasaǵany anyqtaldy", – dep túsindirdi sýdia Mártpek Kákimjanov.
Aiyptaýshy tarap Ysqaqovty Qazaqstan Respýblikasy Qylmystyq kodeksiniń 434-baby "Qylmys týraly habarlamaý" boiynsha kináli dep tanyp, úsh jyl merzimge bas bostandyǵynan aiyrýdy surady.
"Sot qasaqana kisi óltirý bolmaǵanyn anyqtaǵandyqtan, Ysqaqov aqtalyp, sot zalynda bosatyldy", – dedi sýdia.
Eske salaiyq, "Fitness Blitz" klýbynyń fitnes jattyqtyrýshysy 28 jastaǵy Damir Tórebaev shildeniń 18-19 qaraǵan túni atyp óltirgen edi. Marqummen bir hostelde turatyn jigitter kisi ólimine qatysy bar degen kúdikke ilindi. Damir Tórebaevty óltirdi degen kúdikpen Bishkekte 31 jastaǵy er adam ustaldy. Sondai-aq onyń buǵan deiin aýyr qylmys jasaǵany úshin jaýapqa tartylǵany belgili boldy.
