الماتىدا فيتنەس-جاتتىقتىرۋشى دامير تٶرەباەۆتىڭ ٶلٸمٸنە قاتىستى سوت پروتسەسٸ اياقتالدى, دەپ حابارلايدى "ۇلت اقپارات" Stan.kz اقپارات اگەنتتٸگٸنە سٸلتەمە جاساپ.
باقىتجان اقىشەۆ قاجەتتٸ ٶزٸن-ٶزٸ قورعاۋ شارالارىن اسىرا ورىنداعانى ٷشٸن كٸنەلٸ دەپ تانىلىپ, وعان ەكٸ جىلعا باس بوستاندىعىنان ايىرۋ جازاسىن قاتاڭ رەجيمدەگٸ كولونييادا ٶتەۋ جازاسى تاعايىندالدى. قىلمىس تۋرالى حابارلامادى دەپ ايىپتالعان دەۋرەن ىسقاقوۆ سوت زالىندا بوساتىلدى.
جارىسسٶزدە پروكۋرور اقىشەۆتى قازاقستان رەسپۋبليكاسى قىلمىستىق كودەكسٸنٸڭ 99-بابىنىڭ 1-بٶلٸگٸ "ادام ٶلتٸرۋ" بويىنشا كٸنەلٸ دەپ تانىپ, 13 جىلعا باس بوستاندىعىنان ايىرىپ, جازاسىن قاتاڭ رەجيمدەگٸ مەكەمەدە ٶتەۋدٸ سۇرادى. الايدا سوت ٸستٸڭ بارلىق مەن-جايىن ەسكەرە وتىرىپ, ونىڭ قورعاۋشىسى تالاپ ەتكەندەي, ٸستٸ قازاقستان رەسپۋبليكاسى قىلمىستىق كودەكسٸنٸڭ 102-بابى "قورعانىس ماقساتىندا ادام ٶلتٸرۋ" بويىنشا قارادى.
"كۋەگەرلەردٸڭ, سوتتالۋشىلاردىڭ بەرگەن جاۋاپتارى, سونداي-اق بالتا مەن ەسٸكتٸ قاراۋ نەتيجەسٸندە مارقۇمنىڭ قاۋٸپتٸ زاتپەن قارۋلانىپ, بۇزاقىلىق ەرەكەتتەر جاساعانى انىقتالدى", – دەپ تٷسٸندٸردٸ سۋديا مەرتپەك كەكٸمجانوۆ.
ايىپتاۋشى تاراپ ىسقاقوۆتى قازاقستان رەسپۋبليكاسى قىلمىستىق كودەكسٸنٸڭ 434-بابى "قىلمىس تۋرالى حابارلاماۋ" بويىنشا كٸنەلٸ دەپ تانىپ, ٷش جىل مەرزٸمگە باس بوستاندىعىنان ايىرۋدى سۇرادى.
"سوت قاساقانا كٸسٸ ٶلتٸرۋ بولماعانىن انىقتاعاندىقتان, ىسقاقوۆ اقتالىپ, سوت زالىندا بوساتىلدى", – دەدٸ سۋديا.
ەسكە سالايىق, "Fitness Blitz" كلۋبىنىڭ فيتنەس جاتتىقتىرۋشىسى 28 جاستاعى دامير تٶرەباەۆ شٸلدەنٸڭ 18-19 قاراعان تٷنٸ اتىپ ٶلتٸرگەن ەدٸ. مارقۇممەن بٸر حوستەلدە تۇراتىن جٸگٸتتەر كٸسٸ ٶلٸمٸنە قاتىسى بار دەگەن كٷدٸككە ٸلٸندٸ. دامير تٶرەباەۆتى ٶلتٸردٸ دەگەن كٷدٸكپەن بٸشكەكتە 31 جاستاعى ەر ادام ۇستالدى. سونداي-اق ونىڭ بۇعان دەيٸن اۋىر قىلمىس جاساعانى ٷشٸن جاۋاپقا تارتىلعانى بەلگٸلٸ بولدى.
