Qazaqstandyq mánerlep syrǵanaýshy Denis Tendi óltirdi degen kúdikti 24 jastaǵy Nuraly Qiiasov qamaýǵa alyndy, dep habarlaidy Sputnik tilshisi sot zalynan.
Búgin keshke Almaly aýdandyq sotynda kúdiktige qatysty bultartpaý sharasyn tańdaý týraly otyrys ótti.
Buǵan deiin jasyrynyp júrgen ekinshi kúdikti Arman Qudaibergenovti syrttai qamaýǵa alýǵa sanktsiia berilgen edi. Shamamen bir saǵattan keiin politsiia ony ustady.
Keiin sotqa Nuraly Qiiasov jetkizildi. Ishki ister ministrligi kúdiktiniń ustalǵanyn búgin tańerteń habarlaǵan bolatyn. Otyrys bastalǵanǵa deiin ony zalǵa qolyndaǵy kisenmen alyp kirdi.
Kúdikti jumyssyz, balalary joq, buǵan deiin isti bolǵan. 2015 jyly avtokólik aidap áketkeni úshin sottalǵan. Sýdia Alma Ábdihalyqova Qiiasovqa sóz berdi.
"Men ol adamǵa pyshaq suqqan joqpyn. Jai ǵana qarap turdym", — dedi Qiiasov basyn tómen salbyratyp.
Sputnik tilshisi sot zalynan habarlaǵandai, Qiiasov emotsiiasyz, aqyryn, asyqpai sóilegen. Sóziniń sońynda biraz kidirdi.
Keiin sýdia keńes bólmesine ketti.
Qiiasovtyń qorǵaýshysy sottan kúdiktini eshqaida shyqpaý týraly qolhatpen bosatýdy surady. Alaida sot kúdiktini qamaýǵa alýǵa negiz jetkilikti ekenin aitty.
Qiiasovqa qatysty eki aiǵa qamaýǵa alý túrinde bultartpaý sharasy sanktsiialandy.
Denis Ten 19 shildede Almatyda pyshaq jaraqatynan qaza tapty. Aldyn ala málimetter boiynsha, meiramhanadan shyqqan sportshy Qurmanǵazy kóshesindegi avtoturaqta turǵan kóligine kele jatyp, Leksýstyń ainalaryn urlamaq bolǵan qaskóilerdi kóredi. Keibir oqiǵa kýágerleriniń aitýynsha, Denis urylardyń sońynan qýyp, toqtatpaq bolǵanda, olar onyń aiaǵyna pyshaq tyǵady. Pyshaqtyń júzi jambas kúretamyryna tigen. Ten sol jerde esinen tanady. Kóp qan joǵaltqan sportshy aýrýhanaǵa túskennen keiin eki saǵattan soń kóz jumdy.
Ekinshi kúdikti – 23 jastaǵy Qyzylorda oblysynyń týmasy Arman Qudaibergenov búgin keshke ustaldy.
