Joǵarǵy sot qudasy 5 jylǵa sottatyp jibergen qudaǵidy aqtap aldy. Bul týraly búgin respýblikalyq sýdialardyń keńeitilgen keńesinde QR Joǵarǵy sotynyń tóraǵasy Jaqyp Asanov aitty, dep habarlaidy QazAqparat.
«Qyzylordada eki jas ajyrasyp, qudalardyń arasynda arazdyq paida bolǵan. Keshegi qudalar bir-birimen aitysa bastaǵan. Bir jaǵynyń jaǵdaiy jaqsy bolýy kerek. Sol ekinshisine «men seni qurtamyn» deidi. Sóitip baryn salyp, tanystaryn salyp, organdardy tartyp, burynǵy qudaǵiyn 5 jylǵa sottatady. Qalalyq sot ta, oblystyq sot ta kóz jumyp qaraǵan. Osy isti jaqynda Joǵarǵy sotta qarap, ol kisini aqtadyq», - dedi Jaqyp Asanov.
Onyń aitýynsha, sol isti qaraǵan tergeýshiniń ózi sottalyp ketken. Óitkeni ol jalǵan jaýaptar jazǵan.
«Odan kim utty? Jastar ajyrasty, qudalar birin-biri kórmeske ainaldy. Sotqa bergen jaq abyroidan aiyryldy, uiatqa qaldy. Qit etse «sotqa beremin, qurtamyn, joiamyn» deitin jaǵymsyz ádet áli de bar. Ol qara basyn oilaǵan, mádenieti tómen adamdarǵa tán qylyq. Naǵyz jónsizdik, ádepsizdik. Tipti kórgensizdik dep te aitýyma bolady. Odan jastarǵa qandai úlgi, qandai ónege?», - dedi Joǵarǵy sot tóraǵasy.
Aita keterligi, Jaqyp Asanov sýdialardy reiderlik syzbalarǵa paidalanatyndyǵyn da naqty mysaldarmen aityp bergen bolatyn.
