Sybailas jemqorlyq boiynsha aiyptalyp otyrǵan burynǵy ministr Qýandyq Bishimbaevty tutqynda ustaý merzimi uzartyldy, dep habarlaidy QazAqparat Astana sotynyń baspasóz qyzmetine silteme jasap.
«Bishimbaevqa qatysty qamaýda ustaý túrindegi bultartpaý sharasy 10 sáýirge deiin uzartyldy»,-dep atap ótilgen astanalyq sot málimetinde.
Budan buryn habarlanǵandai, «Báiterek UBH» AQ basqarmasynyń burynǵy tóraǵasy Qýandyq Bishimbaevqa qatysty qylmysty tergeý amaldary júrip jatyr. Sybailas jemqorlyqqa qarsy kúres ulttyq biýrosy habarlaǵandai, ol bir top adammen aldyn ala kelisip, birneshe ret iri kólemde para aldy dep aiyptalýda.
Bishimbaev Qyzylorda qalasynda tabaq shyny shyǵaratyn jáne óńdeitin zaýyt salý kezinde «Orda Glass» JShS-nyń vedomstvolyq baǵynystaǵy kompaniiasy men onyń merdigerlik uiymy «Shymkenthimmontaj» JShS arqyly 1 mlrd teńge jymqyrý qylmystyq shemasyn uiymdastyrǵan degen kúdikke ilindi. Osy oraida ol atalǵan somanyń 2 mln AQSh dollaryn ózine alǵandyǵy tekserilýde.
Biylǵy 10 qańtarda Sybailas jemqorlyqqa qarsy kúres ulttyq biýrosy burynǵy QR Ulttyq ekonomika ministri Qýandyq Bishimbaevty ustaǵandyǵy habarlanǵan bolatyn.
Úsh kúnnen keiin eks-ministr eki aiǵa tutqyndalǵandyǵy týraly aqparat tarady.
