Kókshetaýda júrgizýshi kýáligi joq áiel kólikpen jaiaý júrginshini qaǵyp, onyń ólimine sebepker bolǵany úshin 2 jyl 6 aiǵa sottaldy. Alaida sot onyń eki kámeletke tolmaǵan balasy bar ekenin eskerip, jazany óteý merzimin úsh jylǵa keiinge qaldyrdy, dep habarlaidy ult.kz.
Qaiǵyly oqiǵa mamyr aiynda turǵyn úi aýlalarynyń birinde bolǵan. Tergeý málimetinshe, áiel kólikpen aýlaǵa burylyp kele jatyp jaiaý júrginshini qaǵyp ketken. Aýyr jaraqat alǵan 52 jastaǵy áiel keiin aýrýhanada kóz jumdy. Belgili bolǵandai, marqum 12 jastaǵy qyzyn jalǵyz tárbielep kelgen.
Sot barysynda aiyptalýshy kinásin tolyq moiyndady. Onyń aitýynsha, kúieýiniń densaýlyǵyna bailanysty jáne onyń ruqsatymen kólik tizginine otyrǵan. Alaida onyń júrgizýshi kýáligi bolmaǵan.
Sot úkim shyǵarǵanda aiyptalýshynyń buryn sottalmaǵanyn, ákimshilik jaýapkershilikke tartylmaǵanyn, jasaǵan isine ókingenin jáne moraldyq shyǵyndy ótegenin nazarǵa aldy. Sondai-aq marqumnyń týystary da ony bas bostandyǵynan aiyrmaýdy suraǵan.
Budan bólek, júrgizýshi kýáligi joq adamǵa kólik basqarýǵa ruqsat bergeni úshin sottalýshynyń jubaiyna qatysty da tergeý júrgizilip jatyr.
