Mánerlep syrǵanaýshy Denis Ten pyshaqtalǵan kúni oqiǵa ornynda bolǵan kýáger Tengrinews.kz tilshisine sportshyǵa alǵashqy kómek qalai kórsetilgeni jaily aityp bergen.
Qaiǵyly oqiǵanyń kýágeri bolǵan qyz 19 shildede dúkennen shyǵyp kele jatyp aiqailap jatqan úsh-tórt adamdy baiqaǵan.
"Olar sý surap jatty, sosyn bir jigit sý alyp keldi. Bir jigit kólik ishinde otyrǵanda úsh jigittiń tóbelesip jatqanyn kórgenin aitty.
Sodan bireýi qulapty. Kóliktegi jigit atyp shyǵyp, jedel járdem shaqyrǵan. Oqiǵa ornynda tehnikalyq pasport jatqan, sodan barlyǵy zardap shekken adamnyń Denis Ten ekenin bildi. Jedel járdem alyp ketkende onyń bir aiaǵy jýan bolyp kórindi. Isinip ketken, qan kóp boldy, biraq eshkim ony óledi dep oilamady. Meiramhanadan daiashy araq alyp shyǵyp, onyń jaraqatyna seppek bolǵan. Ten sol meiramhanadan shyqqan, kóligi joldyń arǵy betinde turdy. Jedel járdem alyp ketkende ol dem alyp jatqan. Ol óldi degenge senbeimin. Ózi tap-taza bolǵan, aiaǵynda ǵana qan kórindi", - deidi kýáger.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
Búgin belgili bolǵandai, sportshynyń ólimine qatysy bar eki kúdiktiniń biri ustalyp, ol qylmysyn moiyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
