Biznesmen Qairat Qudaibergen Almatyda Denis Tendi óltirdi degen kúdiktini kórip, er adamdy sipattap berdi, - dep habarlaidy Tengrinews.kz tilshisi.
"Búgin 11.30-da dosymdy ertip, Denis Tenge shabýyl jasalǵan jerge gúl qoiý úshin keldim. Duǵa oqyp, bir minýt únsizdik saqtaǵannan keiin qaitýǵa bel býdyq, osy kezde kóptegen politsei men prokýrorlyń Denisti óltirgen er adamdy alyp bara jatqanyn kórdik", - dep jazdy ol Instagram jelisinde.
Ol qylmys ornyna gúl qoiý úshin kelgen adamdardyń kúdiktige aiǵailap, qarǵap-silegenin aitty.
"Qanypezer A4 formatyndaǵy qaǵazben betin jaýyp, jylap bara jatty... Tergeýshi oqiǵanyń qalai bolǵanyn surap jatty, qanypezer jaýap berdi, úndegisi kelmegendei. Militsiiada jumys istegende naǵyz baskeserler men retsidivisterdi kórgenmin. Bul jigit bolsa ap-aryq, usaq ury. Qolyna pyshaq alǵanda oiynda ne bolǵanyn bilmeimin, biraq daryndy adamdy óltirýdi oilamaǵany anyq. Biraq qylmys jasaldy jáne ol qatań jazalanýy tiis", - dedi Qairat Qudaibergen.
Eske salaiyq, keshe, 19 shildede Almatyda belgisiz bireýler Denis Tendi pyshaqtap ketken bolatyn. Oqiǵa shamamen 15.00-de Qurmanǵazy men Baiseiitova kósheleriniń qiylysynda bolǵan. Keiin qalalyq IID ókilderi Denis Tenge avtourylar shabýyl jasaǵanyn málimdedi. Sóitsek, sportshy urylardyń ústinen túsken bolyp shyqty. Janjal kezinde sportshynyń aiaǵyna pyshaq tiip, kóp qan joǵaltqan. Ol aýrýhanada kóz jumdy.
