«Qazaqstan temir joly» AQ óndiristik qyzmetkerleriniń jalaqysyn 66 paiyzǵa kóterdi. Bul týraly atalǵan kompaniianyń basqarma tóraǵasy Nurlan Saýranbaev aitty, dep habarlaidy QazAqparat.
«Is júzinde óndiristik qyzmetkerlerdiń jalaqysyn 66 paiyzǵa kóterdik. Jalaqy qoryn osy deńgeide ustap tura alsaq jaqsy bolar edi. Osy jalaqy qoryn ózimiz ustap turmyz. Biraq, jalaqy qorynyń úshten ekisi tranzit esebinen óteledi. Alaida, búgingi ahýalǵa bailanysty Resei arqyly tranzit 43 paiyzǵa quldyrady. Soǵan orai bizdiń kirisimiz de tómendedi. Endi jalaqy qoryn qarjylandyrý máselesi kóteriledi. Jalaqy deńgeiin ustap turý úshin Úkimetke júginip, ishki resýrstardy da izdeýge tyrysamyz», - dedi kompaniia basshysy «2025 jylǵa deiin halyqtyń tabysyn arttyrý baǵdarlamasy» keshendi josparyn júzege asyrý jónindegi keńes barysynda BAQ ókilderiniń saýalyna orai.
Onyń aitýynsha, jalaqynyń qazirgi deńgeiin ustap turý úshin QTJ memleketten shamamen 90 mlrd teńge suraýdy josparlap otyr.
«Biz jalaqyǵa 300 mlrd teńgeden astam qarajat jumsaimyz. Onyń 111 mlrd teńgesi tarifke qosylǵan. Al 200 mlrd teńgeni óndiristik qyzmetten, onyń ishinde tranzitten túsetin kiristen alamyz. Demek, tranzit esebinen óteimiz. Úkimet bizge alýǵa múmkindik berdi. Eger qazirgi ýaqytta tranzit tómendeitin bolsa, onda tómendegen kólemge aqsha suraimyz. Shamamen 90 mlrd teńge dep eseptep otyrmyz», - dedi Nurlan Saýranbaev.
