«Jolaýshylar tasymaly» AQ № 7/8 «Almaty-Máskeý» baǵytynda qatynaityn poiyzdyń joly Saratov stantsiiasyna deiin qysqarǵany týraly habarlama taratty, dep habarlaidy Ult.kz tilshisi QazAqparat agenttigine silteme jasap.
«2013 jyldan beri № 7/8 «Almaty-Máskeý» baǵytyndaǵy poiyz jolaýshylary sanynyń azaiýy baiqalyp keledi. Kórsetilgen kezeńde osy baǵyttaǵy jolaýshylar sany 2 esege tómendegen. Almaty men Máskeý aralyǵynda qatynaityn tikelei halyqaralyq baǵyttaǵy poiyzǵa adamdardyń otyrýy 40%-ǵa jetpeidi, sondyqtan tiimsiz bolyp tur. Alaida, jolaýshylardyń múddesin esepke alyp, «Resei temir joly» AQQ-men («RTJ» AQQ) birlese otyryp, poiyzdy toqtatýdyń ornyna marshrýtty Saratov stantsiiasyna deiin qysqartý týraly sheshim qabyldandy», - delingen habarlamada.
Poiyzdyń kestesi jolaýshylardyń Saratov stantsiiasynan № 17/18 «Saratov-Máskeý» poiyzyna otyratyn ýaqyty eskerile otyryp jasaldy.
