Qasym-Jomart Toqaevtyń tóraǵalyq etýimen bolǵan Parlament Senatynyń otyrysynda birqatar zań jobalary qaraldy jáne ótip bara jatqan mereili jyl qorytyndylandy, - dep habarlaidy "Ult aqparat" Qazaqstan Respýblikasy Parlamenti Senatynyń Baspasóz qyzmetine silteme jasap.
Tóraǵa jýyrda Parlament qabyldaǵan asa mańyzdy saiasi-quqyqtyq qujat - el Táýelsizdiginiń 25 jyldyǵy Deklaratsiiasynda Qazaqstannyń qol jetkizgen jetistikteri men jeńisteri aishyqtalǵanyn, táýelsiz Qazaqstandy qurýǵa jáne qalyptastyrýǵa eren eńbek sińirgen Qazaqstan Respýblikasynyń Prezidenti - Elbasy Nursultan Ábishuly Nazarbaevtyń kemeńgerlik qyzmetine tarihi baǵa berilgenin erekshe atap ótti.
Zań shyǵarý jumystaryn qorytyndylaǵan Q.Toqaev Senat Parlament fýnktsiiasyn atqarǵan kezeńde joǵarǵy Palata Úkimetpen tyǵyz bailanysta jumys júrgize otyryp, 57 zańdy ýaqytyly qabyldaǵanyn ári óziniń konstitýtsiialyq ókilettigin abyroimen atqarǵanyn eske saldy. Ústimizdegi jyly Parlament qabyldaǵan júzden asa zań "100 naqty qadam" Ult josparyn, sondai-aq elimizdiń áleýmettik-ekonomikalyq órleýin kózdeitin strategiialyq baǵdarlamalardy iske asyrýdyń zańnamalyq negizin tolyq qalyptastyrdy.
Senat Tóraǵasy Palata ótkizgen birqatar mańyzdy is-sharalarǵa da toqtaldy. "Eýraziialyq ekonomikalyq odaq pen Dúniejúzilik saýda uiymy jaǵdaiynda otandyq agrarlyq sektordyń básekege qabilettiligin arttyrý, jol qozǵalysy salasyn quqyqtyq retteý jáne elimizdegi biologiialyq alýantúrliliktiń saqtalýyn zańnamalyq qamtamasyz etý máselelerine arnalǵan parlamenttik tyńdaýlarda qoǵamda oryn alyp otyrǵan ótkir máseleler talqylanyp, tiisti memlekettik organdarǵa naqty nusqaýlar berildi", - dedi Qasym-Jomart Toqaev.
2016 jyly senatorlar elimizdiń syrtqy saiasi bastamalaryn qoldaý jáne shet memleketterdiń parlamentterimen yntymaqtastyǵyn tereńdetý jóninde eleýli jumystardy júzege asyrdy. "Palatanyń bastamasymen álem elderi parlamentteri men din ókilderiniń, sondai-aq tanymal saiasatkerlerdiń qatysýymen "Dinder terrorizmge qarsy» halyqaralyq konferentsiiasy oidaǵydai ótkizildi. Elbasynyń "Álem. XXI ǵasyr" tarihi manifesiniń mańyzy men iadrolyq qarýsyz álem qurý máselelerin talqylaýǵa arnalǵan Senattyń uiymdastyrýymen ótken aýqymdy halyqaralyq konferentsiia Qazaqstannyń jahandyq beibitshilik pen qaýipsizdikti nyǵaitý jónindegi bastamalarynyń ózektiligin aishyqtai tústi", - dedi ol.
Senattyń aldaǵy jumystary týraly aita kelip, Toqaev el táýelsizdigimizdiń 25 jyldyǵyna arnalǵan saltanatty jiyndaǵy Prezidenttiń sózinde memleket damýynyń jańa satysyna kóshý jaǵdaiynda Parlament pen Úkimettiń jaýapkershiligin kúsheitý máselesin kún tártibine qoiylǵanyn eske saldy. Tóraǵa: "Aldaǵy ýaqytta, osy mańyzdy másele jan-jaqty tereń zerdelenip, tiisti zańdarǵa ózgerister engizý boiynsha usynystar ázirlenetin bolady. Senatorlar memlekettik basqarý júiesin odan ári jańǵyrtýdy kózdeitin mańyzdy zań jobalarymen jumysty kásibi turǵydan asqan jaýapkershilikpen júrgizetinine men kámil senemin", - dedi.
Condai-aq, Q.Toqaev qańtardyń 4-i men 13-i aralyǵynda depýtattardyń óńirlerge sapary josparlanyp otyrǵanyn jetkizdi. "Ótkiziletin kezdesýler barysynda Parlament qabyldaǵan zańdardy halyqqa jan-jaqty nasihattaý jumysyn júrgizý qajet. Qabyldanǵan jańa zańdardyń erejelerine, ásirese, áleýmettik sala, densaýlyq saqtaý, qarjy, salyq, turǵyn úi jáne terrorizmge qarsy is-qimyl máselelerine basa nazar aýdarǵan jón", - dedi ol.
Toqaev áriptesterin birlesip atqarǵan jumystary úshin alǵysyn bildirip, kele jatqan Jańa jylmen quttyqtady.
Otyrys barysynda senatorlar Qazaqstan men Iran arasyndaǵy sottalǵan adamdardy berý týraly kelisimdi ratifikatsiialady.
2016 jyly 11 sáýirde Tegeranda qol qoiylǵan Kelisim Iran Islam Respýblikasynyń sottary bas bostandyǵynan aiyrýǵa sottaǵan Qazaqstan Respýblikasynyń azamattaryn jáne Qazaqstan Respýblikasynyń sottary bas bostandyǵynan aiyrýǵa sottaǵan Iran Islam Respýblikasynyń azamattaryn odan ári jazasyn ózderi azamaty bolyp tabylatyn memlekette óteý úshin berý máselelerin retteidi.
Palata Qazaqstan men Sloveniia arasyndaǵy Tabys pen kapitalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsiiany jáne oǵan Hattamany ratifikatsiialady.
Konventsiianyń maqsaty investitsiialar úshin qolaily jaǵdai jasaý arqyly Qazaqstan Respýblikasy men Sloveniia Respýblikasy arasyndaǵy ekonomikalyq yntymaqtastyqty nyǵaitý jáne keńeitý bolyp tabylady.
Konventsiia ekijaqty halyqaralyq shart bolyp tabylady jáne qosarlanǵan salyq salýdy boldyrmaý maqsatynda jasalǵan. Ýaǵdalasýshy memleketterdiń árqaisysy salyq tóleýshige bir ret birinde ǵana salyq tóleý múmkindigin qamtamasyz etedi. Ekinshi memleket tólengen salyq somasyn esepke alady nemese salyq salynatyn jiyntyq tabystan ekinshi memlekette salyq salynǵan tabystyń bóligi shegeriledi.
Sonymen qatar, otyrysta "Jaiylymdar týraly" zań jobasy birinshi oqylymda qaralyp, maquldandy.
Zań jobasy jaiylymdardy utymdy paidalanýǵa bailanysty qoǵamdyq qatynastardy retteidi. Qujattyń erejeleri jergilikti turǵyndardyń malyn jaiýǵa arnalǵan jaiylymdar jónindegi qajettilikterin qamtamasyz etýge, ondaǵy infraqurylym nysandarynyń jaǵdaiyn jaqsartýǵa, jaiylymdyq jerlerdi tozdyrmaýǵa bailanysty sharalardy júzege asyrýǵa baǵyttalǵan. Otyrysta "Qazaqstan Respýblikasynyń keibir zańnamalyq aktilerine jaiylymdardy paidalaný máseleleri boiynsha ózgerister men tolyqtyrýlar engizý týraly" ilespe zań jobasy birinshi oqylymda maquldandy.
Jobaǵa sáikes Jer, Orman, Sý kodeksterine, sondai-aq "Erekshe qorǵalatyn tabiǵi aýmaqtar týraly» jáne "Qazaqstan Respýblikasyndaǵy jergilikti memlekettik jáne ózin-ózi basqarý týraly" zańdarǵa ózgerister engiziledi. Atap aitqanda, orman, sý qorlarynyń jáne erekshe qorǵalatyn tabiǵi aýmaqtardyń jerlerine shóp shabý men mal baǵý uǵymdaryn retteitin qoldanystaǵy zańdardyń erejeleri odan ári jetildiriletin bolady. Jergilikti ózin-ózi basqarý týraly zańnamaǵa engiziletin ózgerister ishinde jaiylymdardy basqarý jáne paidalaný máselelerin talqylaý men sheshim qabyldaýǵa azamattardy tartý týraly máseleler qamtylǵan.
