Foto: ashyq derekkóz
Astanada eks-sheneýnik Erjan Babaqumarovtyń ólimine eki ret sottalǵan er adam kúdikti retinde ustaldy, dep habarlaidy Ult.kz.
Kozachkov offside Telegram arnasynyń habarlaýynsha, Astanada qaza tapqan burynǵy memlekettik qyzmetker Erjan Babaqumarovtyń ólimine bailanysty eki ret sottalǵan 36 jastaǵy Erbol Qaýketai esimdi azamat kúdikke ilindi.
29 qazan kúni saǵat 23:00 shamasynda elordadaǵy «Milleniým» turǵyn úi keshenine jedel járdem shaqyrylǵan. Habarlasqan er adam tanysynyń jaǵdaiy nasharlaǵanyn aitqan. Oqiǵa ornyna kelgen dárigerler er adamnyń kóz jumǵanyn anyqtaǵan. Keiin marqumnyń kim ekeni belgili bolyp, onyń buryn Almaty qalasy ákiminiń orynbasary qyzmetin atqarǵan Erjan Babaqumarov ekeni rastaldy.
Tergeý málimetinshe, kúdikti Erbol Qaýketai buǵan deiin de zorlyq-zombylyq áreketteri úshin eki ret sottalǵan. 2010 jyly ol qasaqana aýyr jaraqat keltirgeni úshin jaýapqa tartylǵan. Al 2025 jyly ortasha aýyrlyqtaǵy dene jaraqatyn salǵany úshin 300 saǵat qoǵamdyq jumysqa mindettelgen.
Babaqumarovpen ol 25 qazanda tanysqan. Qaýketai internet arqyly krossovka satqan, al satyp alýshy ózin «Alihan» dep tanystyryp, aqshanyń bir bóligin ǵana tólegen. Keiin ekeýi qaita kezdesip, birge ishimdik ishken.
Politsiia dereginshe, sol túni páterde ekeýiniń arasynda tóbeles bolyp, Qaýketai Babaqumarovty birneshe ret urǵan. Marqum jerge qulap, júregin ustap qalǵan. Kúdikti dereý anasymen bailanysyp, jedel járdem shaqyrǵan. Alaida dárigerler onyń ómirin saqtap qala almady.
Qazir Erbol Qaýketai qamaýǵa alyndy. Tekserý barysynda onyń is-áreketi qasaqana aýyr dene jaraqatyn keltirý nemese abaisyzda adam ólimine sebep bolý babymen saralanýy múmkin.
Eske sala keteiik, Erjan Babaqumarov 2022 jylǵy qańtar oqiǵalary kezinde Almaty qalasy ákiminiń orynbasary qyzmetin atqarǵan. Keiin ol memlekettik qyzmetten ketken. 2025 jyldyń basynda Babaqumarov mas kúiinde kólik júrgizgeni úshin 15 táýlikke qamalyp, júrgizýshi kýáliginen jeti jylǵa aiyrylǵan bolatyn.
